വേനൽക്കാലത്ത് വിപണിയിൽ സജീവമാകുന്ന ലിച്ചി കുട്ടികൾക്കും മുതിർന്നവർക്കും ഒരുപോലെ പ്രിയപ്പെട്ട പഴമാണ്. മികച്ച രുചിക്കൊപ്പം ശരീരത്തിന് ആവശ്യമായ നിരവധി പോഷകങ്ങളും നൽകാൻ ലിച്ചിക്ക് കഴിയും. എന്നാൽ, അമൃതും അമിതമായാൽ വിഷം എന്ന് പറയുന്നതുപോലെ ലിച്ചി അമിതമായി കഴിക്കുന്നത് ശരീരത്തിന് ദോഷം ചെയ്യുമെന്നാണ് ആരോഗ്യ വിദഗ്ദ്ധർ ചൂണ്ടിക്കാണിക്കുന്നത്.
വിറ്റാമിൻ സി ധാരാളമായി അടങ്ങിയിട്ടുള്ളതിനാൽ ശരീരത്തിന്റെ രോഗപ്രതിരോധ ശേഷി വർദ്ധിപ്പിക്കാൻ ലിച്ചി മികച്ചതാണ്.
ഇതിലടങ്ങിയിരിക്കുന്ന ആന്റിഓക്സിഡന്റുകൾ ചർമ്മത്തെ ആരോഗ്യത്തോടെ നിലനിർത്താനും വാർദ്ധക്യ സഹജമായ ചുളിവുകൾ തടയാനും സഹായിക്കുന്നു.
നാരുകൾ അടങ്ങിയിട്ടുള്ളതിനാൽ ദഹനപ്രക്രിയ വേഗത്തിലാക്കാനും മലബന്ധം പോലുള്ള പ്രശ്നങ്ങൾ ഒഴിവാക്കാനും ഇത് നല്ലതാണ്.ലിച്ചിയിലുള്ള പൊട്ടാസ്യം രക്തസമ്മർദ്ദം സാധാരണ നിലയിലാക്കാൻ സഹായിക്കും.
ലിച്ചിയിൽ ഹൈപ്പോഗ്ലൈസിൻ എ , എം.സി.പി.ജി എന്നീ ഘടകങ്ങൾ അടങ്ങിയിട്ടുണ്ട്. വെറുംവയറ്റിൽ ലിച്ചി അമിതമായി കഴിച്ചാൽ രക്തത്തിലെ പഞ്ചസാരയുടെ അളവ് പെട്ടെന്ന് താഴേക്ക് പോകാൻ ഇത് കാരണമാകും.
പ്രകൃതിദത്ത പഞ്ചസാര ധാരാളമായി അടങ്ങിയിട്ടുള്ളതിനാൽ അമിതമായി കഴിക്കുന്നത് ശരീരഭാരം കൂട്ടാൻ ഇടയാക്കും.
ചില ആളുകളിൽ ലിച്ചി കഴിക്കുന്നത് വഴി ചൊറിച്ചിൽ, തൊലിപ്പുറത്ത് ചുവന്നു തടിക്കൽ തുടങ്ങിയ അലർജി പ്രശ്നങ്ങൾ ഉണ്ടായേക്കാം.
ആരോഗ്യ വിദഗ്ദ്ധരുടെ അഭിപ്രായത്തിൽ ഒരു ദിവസം 8 മുതൽ 10 വരെ ലിച്ചി പഴങ്ങൾ കഴിക്കുന്നതാണ് സുരക്ഷിതം. പ്രമേഹ രോഗമുള്ളവർ ഡോക്ടറുടെ നിർദ്ദേശപ്രകാരം മാത്രം ലിച്ചി കഴിക്കുക. പ്രത്യേകിച്ച് കുട്ടികൾ വെറുംവയറ്റിൽ ലിച്ചി കഴിക്കുന്നില്ല എന്ന് മാതാപിതാക്കൾ ഉറപ്പുവരുത്തണം.
