അന്താരാഷ്ട്ര ക്രിക്കറ്റ് കൗൺസിലിന്റെ ഏറ്റവും പുതിയ ട്വന്റി-20 ബാറ്റിങ് റാങ്കിങ്ങിൽ സഹതാരം അഭിഷേക് ശർമ്മയെ മറികടന്ന് ഇന്ത്യൻ വിക്കറ്റ് കീപ്പർ ബാറ്റർ ഇഷാൻ കിഷൻ ഒന്നാം സ്ഥാനത്ത്. ഈ നേട്ടം കൈവരിക്കുന്ന നാലാമത്തെ മാത്രം ഇന്ത്യൻ പുരുഷ ബാറ്ററാണ് ഇഷാൻ കിഷൻ. അതേസമയം, ടെസ്റ്റ് റാങ്കിങ്ങിൽ ജോ റൂട്ടിനെ പിന്നിലാക്കി ഓസ്ട്രേലിയയുടെ ട്രാവിസ് ഹെഡ് ഒന്നാം സ്ഥാനത്തേക്ക് മുന്നേറി.
രണ്ട് വർഷത്തിലേറെ നീണ്ട ഇടവേളയ്ക്ക് ശേഷം കഴിഞ്ഞ ജനുവരിയിലാണ് ഇഷാൻ കിഷൻ ഇന്ത്യൻ ട്വന്റി-20 ടീമിലേക്ക് തിരിച്ചെത്തിയത്. ന്യൂസിലൻഡിനെതിരെ നേടിയ 76, 103 റൺസ് പ്രകടനങ്ങളാണ് താരത്തിന് ട്വന്റി-20 ലോകകപ്പ് ടീമിലേക്ക് വഴിതുറന്നത്. ലോകകപ്പിൽ ഇന്ത്യ കിരീടം നിലനിർത്തിയപ്പോൾ 317 റൺസുമായി ടൂർണമെന്റിലെ നാലാമത്തെ ഉയർന്ന റൺവേട്ടക്കാരനാകാനും ഇഷാന് സാധിച്ചു.
ഇഷാൻ കിഷന് മുൻപ് ഇന്ത്യയിൽ നിന്ന് വിരാട് കോഹ്ലി, സൂര്യകുമാർ യാദവ്, അഭിഷേക് ശർമ്മ എന്നിവർ മാത്രമാണ് ഐസിസി ടി20 ബാറ്റിങ് റാങ്കിങ്ങിൽ ഒന്നാം സ്ഥാനത്ത് എത്തിയിട്ടുള്ളത്. അയർലൻഡിനെതിരായ പരമ്പരയിൽ പരാജയപ്പെട്ടെങ്കിലും മികച്ച പ്രകടനം പുറത്തെടുത്ത ഓൾറൗണ്ടർ ശിവം ദുബെ മൂന്ന് സ്ഥാനങ്ങൾ മെച്ചപ്പെടുത്തി ടി20 ഓൾറൗണ്ടർമാരുടെ പട്ടികയിൽ ഏഴാം സ്ഥാനത്തെത്തി.
ന്യൂസിലൻഡിനെതിരായ ടെസ്റ്റ് പരമ്പരയിൽ പ്രതീക്ഷിച്ച പ്രകടനം പുറത്തെടുക്കാൻ കഴിയാതെ പോയതോടെയാണ് (3 ടെസ്റ്റുകളിൽ നിന്ന് 171 റൺസ്) ഇംഗ്ലണ്ടിന്റെ ജോ റൂട്ട് ഒന്നാം സ്ഥാനത്ത് നിന്ന് മൂന്നാമതിലേക്ക് വീണത്. ഇതോടെ ഓസീസ് താരം ട്രാവിസ് ഹെഡ് ടെസ്റ്റ് ബാറ്റിങ്ങിൽ ഒന്നാമനായി. ഇംഗ്ലണ്ടിന്റെ ഹാരി ബ്രൂക്ക് രണ്ടാം സ്ഥാനത്ത് തുടരുന്നു.
ബൗളർമാരുടെ ടെസ്റ്റ് റാങ്കിങ്ങിൽ ന്യൂസിലൻഡിന്റെ മാറ്റ് ഹെൻറിക്ക് പരിക്കേറ്റത് തിരിച്ചടിയായപ്പോൾ ഇന്ത്യൻ പേസ് ഇതിഹാസം ജസ്പ്രീത് ബുമ്ര ഒന്നാം സ്ഥാനം തിരിച്ചുപിടിച്ചു. ഇംഗ്ലണ്ട്-ന്യൂസിലൻഡ് ടെസ്റ്റ് പരമ്പരയോടെ അന്താരാഷ്ട്ര ക്രിക്കറ്റിൽ നിന്ന് വിരമിച്ച ബെൻ സ്റ്റോക്സ് ടെസ്റ്റ് ഓൾറൗണ്ടർമാരുടെ പട്ടികയിൽ മൂന്നാം സ്ഥാനത്തായാണ് തന്റെ കരിയർ അവസാനിപ്പിച്ചത്.
