ഇംഗ്ലണ്ടിനെതിരായ ഒന്നാം ട്വന്റി-20 മത്സരത്തിൽ ഒരു റണ്ണിന് പുറത്തായ മലയാളി താരം സഞ്ജു സാംസണെ പിന്തുണച്ച് മുൻ ഇന്ത്യൻ താരം സാബ കരീം. കരിയറിൽ തുടർച്ചയായി കുറഞ്ഞ റൺസിന് ഔട്ടാകുന്ന മോശം ഘട്ടങ്ങളിലൂടെ സഞ്ജു കടന്നുപോകാറുണ്ടെന്നും, എന്നാൽ ഇതിൽ നിന്നെല്ലാം ശക്തമായി തിരിച്ചുവന്ന് വമ്പൻ ഇന്നിങ്സ് കളിക്കാൻ താരത്തിന് സാധിക്കുമെന്നും അദ്ദേഹം പ്രത്യാശ പ്രകടിപ്പിച്ചു. അതേസമയം, സഞ്ജുവിന്റെ ബാറ്റിങ്ങിലെ സാങ്കേതിക പിഴവുകളെയും ഇംഗ്ലണ്ടിന്റെ തന്ത്രങ്ങളെയും കുറിച്ച് മുൻ താരം ഇർഫാൻ പഠാനും നിരീക്ഷണം നടത്തി.
കഴിഞ്ഞ ബുധനാഴ്ചഡർഹാമിൽ നടന്ന മത്സരത്തിൽ ടോസ് നേടി ബാറ്റിങ്ങിനിറങ്ങിയ ഇന്ത്യക്കായി ഓപ്പണറായെത്തിയ സഞ്ജു 7 പന്തിൽ നിന്ന് ഒരു റൺസ് മാത്രമാണ് എടുത്തത്. മത്സരത്തിൽ ഇന്ത്യ 189/7 എന്ന ശക്തമായ സ്കോർ പടുത്തുയർത്തിയെങ്കിലും മഴ വില്ലനായതോടെ ഇംഗ്ലണ്ടിന് മറുപടി ബാറ്റിങ് ആരംഭിക്കാൻ കഴിഞ്ഞില്ല. ഇതോടെ മത്സരം ഉപേക്ഷിക്കുകയായിരുന്നു.
സഞ്ജുവിന്റെ ഈ ബാറ്റിങ് തകർച്ചയെക്കുറിച്ച് സാബ കരീം പറഞ്ഞത് ഇങ്ങനെ: “സഞ്ജു നേരിട്ട ഏഴാമത്തെ പന്തിലാണ് ഔട്ടായത്. അതിന് മുൻപ് കളിച്ച 6 പന്തുകളിൽ നിന്നും ഒന്നുകിൽ ഒരു വലിയ ഷോട്ട് അല്ലെങ്കിൽ വിക്കറ്റ് വരാൻ പോകുന്നു എന്നൊരു പ്രതീതി ഉണ്ടായിരുന്നു. സഞ്ജുവിന്റെ കരിയറിൽ ഇത്തരം ഘട്ടങ്ങൾ പതിവാണ്. വിക്കറ്റ് പോവുകയാണെങ്കിൽ ആദ്യ 10 പന്തുകൾക്കുള്ളിൽ അത് സംഭവിക്കും. എന്നാൽ ആ തുടക്കക്കടമ്പ താരം അതിജീവിച്ചാൽ പിന്നീട് ഒരു വമ്പൻ ഇന്നിങ്സ് തന്നെ സഞ്ജുവിൽ നിന്ന് കാണാം. ഇംഗ്ലീഷ് ബൗളർമാർ എറിഞ്ഞ ലെങ്ത് സഞ്ജുവിനെ വല്ലാതെ അസ്വസ്ഥനാക്കി. ഷോട്ടുകൾ കളിക്കാനുള്ള റൂമോ എലിവേഷനോ താരത്തിന് ലഭിച്ചില്ല. പേസ് ബൗളർമാർക്കെതിരെ ഇൻഫീൽഡിന് മുകളിലൂടെ അടിച്ചുപറത്തുന്നതാണ് സഞ്ജുവിന്റെ ശൈലി. ഇംഗ്ലണ്ട് അത് തടഞ്ഞതോടെ സഞ്ജുവിന് മേൽ സമ്മർദ്ദമേറി.”
അയർലൻഡിനെതിരായ ആദ്യ മത്സരത്തിൽ 5 റൺസിനും രണ്ടാം മത്സരത്തിൽ പൂജ്യത്തിനും പുറത്തായ സഞ്ജുവിന് കഴിഞ്ഞ മൂന്ന് ഇന്നിങ്സുകളിൽ നിന്ന് വെറും 6 റൺസ് മാത്രമാണ് നേടാനായത്. സഞ്ജു ഇംഗ്ലണ്ടിന്റെ കൃത്യമായ പ്ലാനിങ്ങിൽ കുടുങ്ങുകയായിരുന്നു എന്നാണ് മുൻ ഓൾറൗണ്ടർ ഇർഫാൻ പത്താൻ വിലയിരുത്തിയത്. സഞ്ജുവിന്റെ ബാറ്റിങ് ടെക്നിക്കിലെ പോരായ്മയാണ് ഇതിന് കാരണം.
“സഞ്ജുവിന്റെ ബാറ്റിന്റെ ഫേസ് എപ്പോഴും അടഞ്ഞ രീതിയിലാണ് ഇരിക്കാറുള്ളത്. ഓഫ് സ്റ്റംപിന് പുറത്തേക്ക് പോകുന്ന ലൈനിലാണ് ഇംഗ്ലണ്ട് പന്തെറിഞ്ഞത്. ബാറ്റ് ഫേസ് ക്ലോസ്ഡ് ആയിരിക്കുമ്പോൾ ഓഫ് സൈഡിലേക്ക് അടിക്കാൻ നോക്കിയാൽ ബാറ്റ് പെട്ടെന്ന് ഓപ്പൺ ആയിപ്പോകും. അതുകൊണ്ടാണ് സഞ്ജു പലപ്പോഴും സ്ലിപ്പിലും കീപ്പർക്കും പിന്നിലും ക്യാച്ച് നൽകി ഔട്ടാകുന്നത്. ഇംഗ്ലണ്ട് കൃത്യമായ ഫീൽഡിങ് മാറ്റം വരുത്തി, അല്പം ഷോർട്ട് ലെങ്തിൽ പന്തെറിഞ്ഞ് സഞ്ജുവിനെ ആ കെണിയിൽ വീഴ്ത്തുകയായിരുന്നു.” പത്താൻ വിശദീകരിച്ചു.
സഞ്ജുവും തൊട്ടുപിന്നാലെ ഇഷാൻ കിഷനും (റൺഔട്ട്) പുറത്തായതോടെ ഇന്ത്യ 6 റൺസിന് 2 വിക്കറ്റ് എന്ന നിലയിൽ തകർന്നിരുന്നു. എന്നാൽ പിന്നീട് തകർത്തടിച്ച അഭിഷേക് ശർമ്മ (24 പന്തിൽ 59), ശ്രേയസ് അയ്യർ (47 പന്തിൽ 68), ശിവം ദുബെ (21 പന്തിൽ 42*) എന്നിവരുടെ മിന്നും പ്രകടനമാണ് ഇന്ത്യയെ മാന്യമായ സ്കോറിലേക്ക് എത്തിച്ചത്.
