ശ്രീലങ്കയ്ക്കെതിരായ ഒന്നാം ക്രിക്കറ്റ് ടെസ്റ്റിന് ശേഷം കുൽദീപ് യാദവിനെ പിന്തുണച്ച് മുൻ ഇന്ത്യൻ താരം രവിചന്ദ്രൻ അശ്വിൻ രംഗത്ത്. ഗാളിൽ നടന്ന മത്സരത്തിൽ മാനവ് സുതറും രവീന്ദ്ര ജഡേജയും ചേർന്ന് 14 വിക്കറ്റുകൾ വീഴ്ത്തിയപ്പോൾ കുൽദീപിന് ഒരു വിക്കറ്റ് മാത്രമാണ് നേടാനായത്. അനുകൂല സാഹചര്യമായിട്ടും വെറും 25 ഓവറുകൾ മാത്രമാണ് കുൽദീപിന് എറിയാൻ കഴിഞ്ഞത്. ഇംഗ്ലണ്ട് പര്യടനത്തിലെ ഏകദിന പരമ്പരയിൽ അവസരം ലഭിക്കാതിരുന്ന താരം യോർക്ക്ഷെയറിലെ കൗണ്ടി മത്സരങ്ങൾക്ക് ശേഷമാണ് ശ്രീലങ്കൻ പര്യടനത്തിനായി ടീമിനൊപ്പം ചേർന്നത്.
താൻ വിരമിച്ചിട്ട് രണ്ട് വർഷമായെങ്കിലും കുൽദീപ് ഇപ്പോഴും ടീമിൽ മൂന്നാമത്തെ സ്പിന്നറായി തുടരുകയാണെന്ന് അശ്വിൻ ചൂണ്ടിക്കാട്ടി. ഒരു ഇലവനിൽ മൂന്നാമത്തെയോ നാലാമത്തെയോ സ്പിന്നറായി പന്തെറിയുക എളുപ്പമല്ലെന്നും, ശ്രീലങ്കയിലെ സാഹചര്യങ്ങളിൽ ആദ്യ 30 ഓവറുകൾക്കുള്ളിൽ കുൽദീപിനെ കൊണ്ടുവരണമായിരുന്നുവെന്നും അദ്ദേഹം പറഞ്ഞു. വൈകി പന്തേൽപ്പിക്കുകയും ചെറിയ സ്പെല്ലുകൾ നൽകുകയും ചെയ്യുന്നത് ഒരു സ്പിന്നറുടെ താളം നഷ്ടപ്പെടുത്തുമെന്നും തന്റെ യൂട്യൂബ് ചാനലിലൂടെ അശ്വിൻ വ്യക്തമാക്കി.
ടീം മാനേജ്മെന്റ് കുൽദീപിന്റെ ആത്മവിശ്വാസം തകർക്കുകയാണെന്നും കഴിവിനൊത്ത് അദ്ദേഹത്തെ ഉപയോഗിക്കുന്നില്ലെന്നും അശ്വിൻ വിമർശിച്ചു. ശുഭ്മാൻ ഗിൽ ഫീൽഡിൽ ഇല്ലാതിരുന്ന സമയത്ത് കെ.എൽ. രാഹുൽ നയിച്ചപ്പോഴാണ് കുൽദീപിന് പന്ത് നൽകിയതെന്നും, ഇതിൽനിന്ന് ക്യാപ്റ്റൻ ഗില്ലിന്റെ മുൻഗണനയിലുള്ള താരമല്ല കുൽദീപ് എന്ന് വ്യക്തമാകുന്നതായും അദ്ദേഹം അഭിപ്രായപ്പെട്ടു. തുടർച്ചയായി പുറത്തിരുത്തുന്നതും അവസരം കിട്ടുമ്പോൾ കൃത്യമായി ഉപയോഗിക്കാത്തതും കളിക്കാരന്റെ കുഴപ്പമല്ലെന്ന് അശ്വിൻ കൂട്ടിച്ചേർത്തു.
ശ്രീലങ്കയ്ക്കെതിരായ രണ്ടാം ടെസ്റ്റിൽ സാരാൻഷ് ജെയിനെപ്പോലെയുള്ള ഓഫ് സ്പിന്നർമാർക്കായി കുൽദീപിനെ മാറ്റാൻ സാധ്യതയുണ്ടെങ്കിലും നിലവിലെ ടീം കോമ്പിനേഷനിൽ മാറ്റം വരുത്തരുതെന്ന് അശ്വിൻ ആവശ്യപ്പെട്ടു. ആദ്യ ടെസ്റ്റ് വിജയിച്ച സാഹചര്യത്തിൽ മൂന്നാം പേസറെ ആവശ്യമില്ലെങ്കിൽ അതേ ഇലവനുമായി തന്നെ ഇന്ത്യ കളിക്കണമെന്നും അദ്ദേഹം നിർദ്ദേശിച്ചു. പരമ്പരയിൽ 1-0ന് മുന്നിലുള്ള ഇന്ത്യ ഞായറാഴ്ച കൊളംബോയിലെ സിംഹളീസ് സ്പോർട്സ് ക്ലബ്ബിൽ നടക്കുന്ന രണ്ടാം ടെസ്റ്റിൽ ശ്രീലങ്കയെ നേരിടും.
