ലഖ്നൗ : ഉത്തർപ്രദേശിലെ കാൺപൂരിൽ സ്വകാര്യ പരിശീലന വിമാനം തകർന്നു വീണ് ഇൻസ്ട്രക്ടറും ട്രെയിനി പൈലറ്റും കൊല്ലപ്പെട്ടു. വ്യാഴാഴ്ച രാവിലെ 11:30 ഓടെ ഗാർഗ് ഏവിയേഷൻ എന്ന പരിശീലന സ്ഥാപനത്തിൽ നിന്ന് പറന്നുയർന്ന ഇരട്ട എഞ്ചിൻ ടെക്നാം വിമാനമാണ് അപകടത്തിൽപ്പെട്ടത്. കാൺപൂരിലെ ഗംഗാ ബാരേജിന് സമീപമുള്ള കാത്രി പ്രദേശത്തെ കൃഷിഭൂമിയിലാണ് വിമാനം പതിച്ചത്. ഗുജറാത്ത് സ്വദേശിയായ ഇൻസ്ട്രക്ടർ സച്ചിൻ ഭാട്ടിയ, കർണാടക സ്വദേശിയായ ട്രെയിനി പൈലറ്റ് അഭിഷേക് പൂജാരി എന്നിവരാണ് ദുരന്തത്തിൽ ജീവൻ വെടിഞ്ഞത്.
പറന്നുയർന്ന് ഏകദേശം 20 മിനിറ്റിനുള്ളിൽ വിമാനത്തിന് നിയന്ത്രണം നഷ്ടപ്പെടുകയും വലിയ ശബ്ദത്തോടെ നിലത്തു പതിക്കുകയുമായിരുന്നു. അപകടത്തിൽ വിമാനം പൂർണ്ണമായും തകർന്ന് അവശിഷ്ടങ്ങൾ പ്രദേശം മുഴുവൻ ചിതറിക്കിടക്കുന്ന നിലയിലാണ്. സംഭവം ശ്രദ്ധയിൽപ്പെട്ട ഉടൻ തന്നെ നാട്ടുകാരും പൊലീസും സ്ഥലത്തെത്തി തിരച്ചിൽ നടത്തിയെങ്കിലും രണ്ട് പേരും സംഭവസ്ഥലത്തു വച്ചുതന്നെ മരണപ്പെട്ടിരുന്നു. ഇൻസ്ട്രക്ടറായ സച്ചിൻ ഭാട്ടിയയ്ക്ക് മൂവായിരത്തിലധികം മണിക്കൂർ വിമാനം പറത്തിയ പരിചയസമ്പത്തുണ്ടായിരുന്നുവെന്ന് കാൺപൂർ പൊലീസ് കമ്മീഷണർ രഘുബീർ ലാൽ വ്യക്തമാക്കി.
അപകടത്തെക്കുറിച്ച് ഡയറക്ടറേറ്റ് ജനറൽ ഓഫ് സിവില് ഏവിയേഷൻ (ഡിജിസിഎ) സാങ്കേതിക അന്വേഷണം ആരംഭിച്ചിട്ടുണ്ട്. സാങ്കേതിക തകരാറാണോ അതോ കാലാവസ്ഥാ വ്യതിയാനമാണോ അപകടത്തിന് വഴിവെച്ചതെന്ന് വിദഗ്ദ്ധ സംഘത്തിന്റെ പരിശോധനയ്ക്ക് ശേഷമേ വ്യക്തമാകൂ. അപകടത്തിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥ് കടുത്ത ദുഃഖവും അനുശോചനവും രേഖപ്പെടുത്തി. മരിച്ചവരുടെ കുടുംബാംഗങ്ങളെ വിവരമറിയിച്ചിട്ടുണ്ടെന്നും മൃതദേഹങ്ങൾ പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകുമെന്നും പൊലീസ് അറിയിച്ചു.
