ജപ്പാനിലെ ഐച്ചി-നഗോയയിൽ നടക്കാനിരിക്കുന്ന ഏഷ്യൻ ഗെയിംസിൽ ഇന്ത്യൻ ക്രിക്കറ്റ് താരങ്ങളുടെ താമസസൗകര്യവുമായി ബന്ധപ്പെട്ട തർക്കത്തിൽ നിലപാട് വ്യക്തമാക്കി ഇന്ത്യൻ ഒളിമ്പിക് അസോസിയേഷൻ (ഐഒഎ). സാധാരണ ഗെയിംസ് വില്ലേജിന് പകരം ഹോട്ടലുകളിലും കപ്പലുകളിലുമായി അത്ലറ്റുകൾക്ക് താമസസൗകര്യം ക്രമീകരിച്ച സംഘാടകരുടെ നടപടിയോടും, ഹോട്ടൽ മുറികളിൽ രണ്ട് കളിക്കാർ വീതം ഒന്നിച്ച് താമസിക്കേണ്ടി വരുന്നതിലും ബിസിസിഐ കടുത്ത അതൃപ്തി അറിയിച്ചിരുന്നു.
എന്നാൽ, ഗെയിംസിലെ 36 ഇനങ്ങളിലുമുള്ള എല്ലാ കായികതാരങ്ങളും പരിശീലകരും ഐഒഎയ്ക്ക് തുല്യരാണെന്നും ആർക്കും പ്രത്യേക പരിഗണന നൽകാനാവില്ലെന്നും ഐഒഎ സിഇഒ രഘുറാം അയ്യർ വ്യക്തമാക്കി. സംഘാടകർ ഏർപ്പെടുത്തിയ ഹോട്ടലുകളിൽ അതൃപ്തിയുണ്ടെങ്കിൽ സ്വന്തം നിലയിൽ മികച്ച താമസസൗകര്യങ്ങൾ ഒരുക്കാൻ ബിസിസിഐക്ക് പൂർണ്ണ സ്വാതന്ത്ര്യമുണ്ടെന്നും, അതിന്റെ ലോജിസ്റ്റിക്സ് കാര്യങ്ങൾ അവർ തന്നെ നിർവ്വഹിക്കേണ്ടി വരുമെന്നും അദ്ദേഹം കൂട്ടിച്ചേർത്തു.
ശ്രേയസ് അയ്യർ നയിക്കുന്ന പുരുഷ ടീമിനെയും ഹർമൻപ്രീത് കൗർ നയിക്കുന്ന വനിതാ ടീമിനെയുമാണ് നിലവിലെ സ്വർണ്ണമെഡൽ ജേതാക്കളായ ഇന്ത്യ ഏഷ്യൻ ഗെയിംസിലേക്ക് അയക്കുന്നത്. പുരുഷ ടീമിന് ത്രീ സ്റ്റാർ ഹോട്ടലിലും വനിതാ ടീമിന് ഫോർ സ്റ്റാർ ഹോട്ടലിലുമാണ് സംഘാടകർ സൗകര്യം നൽകിയിട്ടുള്ളത്. താരങ്ങൾക്കായി വിവിഎസ് ലക്ഷ്മൺ പുരുഷ ടീമിന്റെയും അമോൽ മുജുംദാർ വനിതാ ടീമിന്റെയും പരിശീലകരായി ഒപ്പമുണ്ട്.
ബിസിസിഐ സിഇഒ ഹേമാംഗ് അമീനുമായി സംസാരിച്ചുവെന്നും സൗകര്യങ്ങൾ നേരിട്ട് വിലയിരുത്താൻ ഒരു സംഘത്തെ നേരത്തെ ജപ്പാനിലേക്ക് അയക്കാൻ ബിസിസിഐ തീരുമാനിച്ചിട്ടുണ്ടെന്നും ഐഒഎ അറിയിച്ചു. സ്വന്തം നിലയിൽ ക്രമീകരണങ്ങൾ നടത്താൻ ബിസിസിഐ തയ്യാറെടുക്കുമ്പോൾ, കായികരംഗത്ത് വിഐപി പരിഗണനകളില്ലെന്ന കർശന നിലപാടിലാണ് ഇന്ത്യൻ ഒളിമ്പിക് അസോസിയേഷൻ.
