ഇംഗ്ലണ്ടിനെതിരായ ടെസ്റ്റ് പരമ്പരയിലെ നാണംകെട്ട തോൽവികൾക്ക് പിന്നാലെ പാകിസ്ഥാൻ ക്രിക്കറ്റ് ടീമിൽ വൻ അഴിച്ചുപണി നടക്കുമ്പോൾ, ക്രിക്കറ്റ് ബോർഡിന്റെയും ടീമിന്റെയും അവസ്ഥയെ രൂക്ഷമായി വിമർശിച്ച് മുൻ പേസർ ഷൊയ്ബ് അക്തർ. ഇംഗ്ലണ്ടിനെതിരായ മൂന്ന് മത്സരങ്ങളുടെ പരമ്പരയിലെ ആദ്യ രണ്ട് ടെസ്റ്റുകളിലും കനത്ത പരാജയം ഏറ്റുവാങ്ങി പരമ്പര ഇതിനകം തന്നെ കൈവിട്ടതിന് പിന്നാലെ പാകിസ്ഥാൻ ക്രിക്കറ്റ് ബോർഡ് (പിസിബി) ടീമിൽ നാടകീയമായ മാറ്റങ്ങളാണ് വരുത്തിയിരിക്കുന്നത്.
ഹെഡിങ്ലിയിൽ ഇന്നിങ്സിനും 103 റൺസിനും ലോർഡ്സിൽ 194 റൺസിനും പരാജയപ്പെട്ട ടീമിൽ നിന്ന് മുഹമ്മദ് റിസ്വാൻ, ഇമാം ഉൾ ഹഖ്, സൽമാൻ അലി ആഘ ഉൾപ്പെടെയുള്ള ഏഴ് പ്രമുഖ താരങ്ങളെയാണ് മൂന്നാം ടെസ്റ്റിന് മുൻപ് തന്നെ ഒഴിവാക്കിയത്. കൂടാതെ മുഖ്യ പരിശീലകൻ സർഫറാസ് അഹമ്മദ്, ബോളിംഗ് പരിശീലകൻ ഉമർ ഗുൽ എന്നിവർ സ്ഥാനമൊഴിഞ്ഞതോടെ മൈക്ക് ഹെസ്സൻ, ആഷ്ലി നോഫ്കെ എന്നിവരെ ടീമിന്റെ ചുമതല ഏൽപ്പിക്കുകയും ചെയ്തു.
നിലവിലെ ടീമിലുള്ള വിശ്വാസം പിസിബിക്ക് പൂർണ്ണമായും നഷ്ടപ്പെട്ടുവെന്നും ഈ സംഘത്തിൽ നിന്ന് ബോർഡ് ഒന്നും പ്രതീക്ഷിക്കുന്നില്ലെന്നും അക്തർ ഒരു അഭിമുഖത്തിൽ വെളിപ്പെടുത്തി. ഇംഗ്ലണ്ട് പര്യടനത്തിൽ ടീമിൽ നിന്ന് എന്താണ് പ്രതീക്ഷിക്കുന്നതെന്ന് താൻ ഒരു പിസിബി ഉദ്യോഗസ്ഥനോട് ചോദിച്ചപ്പോൾ ‘ഒന്നുമില്ല’ എന്നായിരുന്നു മറുപടിയെന്നും, അടുത്ത തലമുറയെ വലിയ വേദികളിലേക്ക് സജ്ജമാക്കുക മാത്രമാണ് ലക്ഷ്യമെന്ന് അദ്ദേഹം പറഞ്ഞതായും അക്തർ ചൂണ്ടിക്കാട്ടി.
പാകിസ്ഥാൻ ക്രിക്കറ്റ് ഇപ്പോൾ ‘വെന്റിലേറ്ററിലാണെന്നും’ ദേശീയ ടീമിന്റെ സംവിധാനങ്ങൾ പഴയപടിയാക്കാൻ കുറഞ്ഞത് രണ്ട് വർഷമെങ്കിലും വേണ്ടിവരുമെന്നും ആ ഉദ്യോഗസ്ഥൻ പറഞ്ഞതായി അക്തർ വ്യക്തമാക്കി. ഇത്തരം മാറ്റങ്ങൾക്കിടയിൽ ഷഹീൻ ഷാ അഫ്രീദി, നസീം ഷാ, ഹാരിസ് റൗഫ് എന്നീ മൂന്ന് പ്രധാന ബൗളർമാരുടെ കരിയർ തകരാതെ സംരക്ഷിക്കാൻ ബോർഡ് ശ്രദ്ധിക്കണമെന്നും, പോരാട്ടവീര്യമില്ലാതെ കീഴടങ്ങിയതിൽ യാതൊരു അത്ഭുതവുമില്ലെന്നും അദ്ദേഹം കൂട്ടിച്ചേർത്തു. പരമ്പരയിലെ വൈറ്റ്വാഷ് ഒഴിവാക്കാൻ അവസാന ടെസ്റ്റിനിറങ്ങുന്ന പാകിസ്ഥാന്റെ ഭാവിയെച്ചൊല്ലി വലിയ ചോദ്യങ്ങളാണ് മുൻ താരങ്ങൾ ഉയർത്തുന്നത്.
