സോഷ്യൽ മീഡിയയിൽ തനിക്കെതിരെ വസ്ത്രധാരണത്തിന്റെ പേരിൽ ഉണ്ടായ ട്രോളുകളിലും വിമർശനങ്ങളിലും തുറന്ന പ്രതികരണവുമായി നടി ഐശ്വര്യ ലക്ഷ്മി രംഗത്ത്. രഞ്ജിനി ഹരിദാസിന് നൽകിയ അഭിമുഖത്തിലാണ് താരം തന്റെ വസ്ത്രധാരണത്തെക്കുറിച്ച് വന്ന ചർച്ചകളെക്കുറിച്ച് മനസ് തുറന്നത്. താൻ ധരിച്ച വസ്ത്രങ്ങളെക്കുറിച്ചുള്ള വിമർശനങ്ങൾ തനിക്ക് ഒരു വിഷയമേ അല്ലെന്നും, എങ്കിലും അന്ന് സംഭവിച്ചത് എന്താണെന്ന് തമാശരൂപേണ അവർ വിശദീകരിക്കുകയുണ്ടായി.
താൻ അണിഞ്ഞ ചില വസ്ത്രങ്ങൾ സുഹൃത്തുക്കളും മാനേജരും വേണ്ടെന്ന് പറഞ്ഞിട്ടും താൻ ധരിക്കാൻ തീരുമാനിക്കുകയായിരുന്നുവെന്നും, ഫാഷന്റെ ഭാഗമായി പുതിയൊരു ട്രെൻഡ് കൊണ്ടുവരാനാണ് താൻ ശ്രമിച്ചതെങ്കിലും അതൊരു വലിയ അമളിയായി മാറിയെന്ന് താരം പറഞ്ഞു. ഒരു ഉദ്ഘാടന ചടങ്ങിന് ശേഷം ഫ്ലൈറ്റ് കയറാൻ പോകും വഴിയാണ് ഒരു ഡയമണ്ട് എക്സിബിഷനിൽ താൻ പങ്കെടുത്തത്. എന്നാൽ അത് പാരീസല്ല പഴവങ്ങാടിയാണെന്ന കാര്യം താൻ മറന്നുപോയെന്നും, അവിടെ തടിച്ചുകൂടിയ ക്യാമറകൾ മുഖത്തിന് പകരം തന്റെ ശരീരഭാഗങ്ങളിലേക്ക് മാത്രം ഫോക്കസ് ചെയ്തത് കണ്ട് അസ്വസ്ഥത തോന്നിയിരുന്നുവെന്നും ഐശ്വര്യ വ്യക്തമാക്കി.
അസ്വസ്ഥത തോന്നി കൈകൾ നെഞ്ചോട് ചേർത്ത് പിടിച്ചപ്പോൾ അത് ബോധം വന്നതാണെന്ന തരത്തിൽ ആളുകൾ തെറ്റായ രീതിയിൽ കമന്റുകൾ പ്രചരിപ്പിച്ചു. താൻ ആ വസ്ത്രം ധരിക്കുന്നതിൽ യാതൊരു അസ്വസ്ഥതയും അനുഭവിച്ചിരുന്നില്ലെന്നും, എന്നാൽ അവിടെയുള്ളവരുടെ കണ്ണുകൾ എന്താണ് തിരയുന്നതെന്ന് തനിക്ക് വ്യക്തമായി അറിയാമായിരുന്നുവെന്നും നടി കൂട്ടിച്ചേർത്തു.
