കൊച്ചി: നെടുമ്പാശേരി അത്താണിയിൽ മൂന്ന് വിദ്യാർഥികളുടെ ദാരുണമായ മരണത്തിനിടയാക്കിയ ആഡംബര കാർ അപകട കേസിൽ പ്രതിയായ 19-കാരൻ സുഹൈൽ സജീവിന്റെ മാതാവ് വിശദീകരണവുമായി രംഗത്ത്. തങ്ങളും സാധാരണക്കാരായ മനുഷ്യരാണെന്നും കുടുംബത്തിന്റെ സ്വകാര്യത മാനിക്കണമെന്നും അഭ്യർത്ഥിച്ചുകൊണ്ട് സമൂഹമാധ്യമങ്ങളിലൂടെയാണ് ആലപ്പുഴ ആലിശേരി നൂഹ് മൻസിലിൽ സുഹൈൽ സജീവിന്റെ അമ്മ വിഡിയോ സന്ദേശം പങ്കുവെച്ചിരിക്കുന്നത്.
അപകടത്തിൽ പൊലിഞ്ഞുപോയ മൂന്ന് ജീവനുകളുടെ കുടുംബങ്ങളുടെ അതിതീവ്രമായ ദുഃഖത്തിൽ ആത്മാർത്ഥമായി പങ്കുചേരുന്നതായി വിഡിയോയിൽ മാതാവ് പറഞ്ഞു. “മക്കളെ നഷ്ടപ്പെടുന്ന മാതാപിതാക്കളുടെ വേദന എത്രത്തോളമുണ്ടെന്ന് നന്നായി അറിയാം. നഷ്ടപ്പെട്ടവരുടെ കുടുംബത്തിന്റെ തീരാദുഃഖത്തിൽ ഞങ്ങൾ പങ്കുചേരുന്നു. ഞങ്ങൾ ജീവിച്ചിരിക്കുന്നിടത്തോളം കാലം മരിച്ച കുട്ടികളുടെ കുടുംബങ്ങൾക്ക് ഒപ്പമുണ്ടാകും. കേസിൽ കൃത്യമായ അന്വേഷണം നടക്കട്ടെ, നിയമം നിയമത്തിന്റെ വഴിയേ പോകട്ടെ. സത്യസന്ധമായ അന്വേഷണത്തിലൂടെ യഥാർത്ഥ വിവരങ്ങൾ പുറത്തുവരട്ടെ,” അവർ വിഡിയോ സന്ദേശത്തിൽ വ്യക്തമാക്കി.
സമൂഹമാധ്യമങ്ങളിൽ തങ്ങളുടെ കുടുംബത്തിനെതിരെ അതിരൂക്ഷമായ കടന്നാക്രമണങ്ങളും പ്രചാരണങ്ങളും നടക്കുന്നുണ്ടെന്ന് അറിയാമെന്നും ആളുകളുടെ ദേഷ്യം മനസ്സിലാക്കുന്നുവെന്നും അവർ പറഞ്ഞു. “ഞാൻ ഒരു അമ്മയാണ്. ജീവൻ നഷ്ടപ്പെട്ട കുട്ടികളെ ഓർത്ത് കടുത്ത വിഷമമുണ്ട്. അതേസമയം തന്നെ എന്റെ മകന്റെ ഭാവിയെക്കുറിച്ചും വലിയ ആശങ്കയും ഭയവുമുണ്ട്. ഇതിന്റെ രണ്ടിനും ഇടയിൽ പെട്ട് എന്തു ചെയ്യണം എന്നറിയാത്ത അവസ്ഥയിലാണ് ഞങ്ങൾ. അതിനാൽ കുടുംബത്തിന് ദയവുചെയ്ത് സ്വകാര്യത നൽകണം,” എന്നും അവർ അഭ്യർത്ഥിച്ചു.
ഒക്ടോബർ 11-നാണ് കേരളത്തെ നടുക്കിയ ദാരുണമായ വാഹനാപകടം നടന്നത്. വിമാനത്താവള റോഡിൽ അത്താണി എയർപോർട്ട് സിഗ്നൽ കവലയ്ക്കു സമീപം വെച്ച് സുഹൈൽ അമിതവേഗതയിൽ ഓടിച്ച ആഡംബര കാർ സ്കൂട്ടറിൽ ഇടിച്ചുതെറിപ്പിക്കുകയായിരുന്നു. അപകടത്തിൽ കർണാടക സുള്ള്യ സ്വദേശി മുഹമ്മദ് ഇയാസ് (22), വയനാട് കൽപ്പറ്റ സ്വദേശിനി കെ.വി.ദേവിക (21), പാലക്കാട് മണ്ണാർക്കാട് സ്വദേശിനി എം.പി.ഗോപിക (22) എന്നീ മൂന്ന് കോളേജ് വിദ്യാർഥികളാണ് ദാരുണമായി കൊല്ലപ്പെട്ടത്. കൊച്ചി നഗരത്തിലെ സ്വകാര്യ കോളജിൽ ബികോം വിദ്യാർഥിയാണ് അപകടമുണ്ടാക്കിയ സുഹൈൽ. സംഭവസമയത്ത് കാറിൽ സുഹൈലിനൊപ്പം ഉണ്ടായിരുന്ന സുഹൃത്തുക്കളെയും പൊലീസ് അറസ്റ്റ് ചെയ്തിരുന്നു. ഇതിനുപിന്നാലെയാണ് പ്രതികരണവുമായി സുഹൈലിന്റെ അമ്മ രംഗത്തെത്തിയത്.
