ലണ്ടന്: ലോഡ്സ് ടെസ്റ്റില് ഇംഗ്ലണ്ടിനെതിരെ പാക്കിസ്ഥാന് 75 റണ്സിന് വിജയംകൈവരിച്ചു. രണ്ടാം ഇന്നിംങ്സില് പാക്കിസ്ഥാന് തീര്ത്ത 283 റണ്സിന്റെ വിജയലക്ഷ്യം പിന്തുടര്ന്ന ഇംഗ്ലണ്ട് 207-ല് പുറത്താവുകയായിരുന്നു. നാല് ടെസ്റ്റുകളുള്ള പരമ്പരയില് ഇതോടെ പാക്കിസ്ഥാന് 10ന് മുന്നിലെത്തി. സ്കോര്: പാക്കിസ്ഥാന് 339, 215; ഇംഗ്ലണ്ട് 272, 207.
ജോണി ബെയര്സ്റ്റോ (48), ഗാരി ബാല്ലാന്സ് (43), ജെയിംസ് വിന്സ് (42) എന്നിവര്ക്ക് മാത്രമേ ഇംഗ്ലണ്ട് നിരയില് ഭേദപ്പെട്ട സ്കോര് നേടാനായുള്ളു. ഇവരെ കൂടാതെ അലക്സ് ഹെയ്ല്സും (16) ക്രിസ് വോക്ക്സും (23)മാത്രമാണ് ഇംഗ്ലണ്ട് നിരയില് രണ്ടക്കം കടന്നത്.
സ്പിന്നര് യാസിര് ഷായുടെ തകര്പ്പന് പ്രകടനമാണ് രണ്ടാം ഇന്നിങ്സിലും ആതിഥേയരുടെ നട്ടെല്ലൊടിച്ചത്. ആദ്യ ഇന്നിങ്സില് ആറു വിക്കറ്റ് നേടിയ യാസിര് രണ്ടാം ഇന്നിങ്സില് നാല് ഇംഗ്ലീഷ് ബാറ്റ്സ്മാന്മാരെ വീഴ്ത്തി. യാസിര് തന്നെയാണ് കളിയിലെ കേമനും.
പാക്കിസ്ഥാനായി റാഹത്ത് അലി മൂന്നും മുഹമ്മദ് ആമിര് രണ്ടും വിക്കറ്റ് നേടി. വഹാബ് റിയാസിനാണ് ഒരു വിക്കറ്റ്. നീണ്ട ഇടവേളക്ക് ശേഷം അന്താരാഷ്ട്ര ക്രിക്കറ്റിലേക്ക് തിരിച്ചുവന്ന മുഹമ്മദ് ആമിറാണ് പാക്കിസ്ഥാനു വേണ്ടി വിജയ വിക്കറ്റ് നേടിയത്. ഒത്തുകളി വിവാദത്തെ തുടര്ന്ന് 2010 ല് ആമിറിനെ വിലക്കിയിരുന്നു.
49 റണ്സെടുത്ത ആസാദ് ഷഫീഖും 45 റണ്സ് അടിച്ച സര്ഫ്രാസ് അഹമ്മദുമാണ് രണ്ടാം ഇന്നിങ്സില് പാക്കിസ്ഥാന് കരുത്തേകിയത്. ആദ്യ ഇന്നിങ്സില് സെഞ്ച്വറി നേടി പുറത്താകാതെ നിന്ന മിസ്ബാ ഉള്ഹഖ് രണ്ടാം ഇന്നിംങ്സില് പൂജ്യത്തിന് പുറത്തായി.
18 ഓവറില് 32 റണ്സ് മാത്രം വിട്ടുകൊടുത്ത് അഞ്ച് വിക്കറ്റെടുത്ത ക്രിസ് വോക്ക്സും മൂന്ന് വിക്കറ്റ് വീഴ്ത്തിയ സ്റ്റുവര്ട്ട് ബ്രോഡും ചേര്ന്നാണ് പാക്കിസ്ഥാന് ബാറ്റ്സ്മാന്മാരെ വേഗത്തില് പുറത്താക്കിയത്. ആദ്യ ഇന്നിങ്സില് ആറു വിക്കറ്റ് നേടിയിരുന്ന ക്രിസ് വോക്ക്സിന്റെ വിക്കറ്റ് നേട്ടം ഇതോടെ പതിനൊന്നായി.
Discussion about this post