ലോ അക്കാദമി കോളേജ് മുന് പ്രിന്സിപ്പലും കൈരളി ടിവി ചാനലിലെ പാചക റിയാലിറ്റി ഷോ അവതാരകയുമായ ലക്ഷ്മി നായര്ക്കെതിരെ കൂടുതല് ആരോപണങ്ങളുമായി മത്സരാര്ഥി രംഗത്തെത്തി. കിച്ചണ് മാജിക് എന്ന റിയാലിറ്റി ഷോയിലെ മത്സരാര്ഥി ഷാനവാസിന്റെ വീഡിയോ ഇതിനോടകം തന്നെ നവമാധ്യമങ്ങളില് വൈറലായിരിക്കുകയാണ്. ഈ റിയാലിറ്റി ഷോ ഒരു പാചകവിദഗ്ദനെ കണ്ടെത്താനല്ലെന്നും ചാനലിന്റെ റേറ്റിംഗിനായി മാത്രമുള്ളതാണെന്നും ലക്ഷ്മി നായര് പറഞ്ഞതായി ഷാനവാസ് വെളിപ്പെടുത്തുന്നു.
കോളേജ് സമയങ്ങളില് ഷൂട്ടിംഗിന് പോകാറില്ലെന്നത് ശുദ്ധകളളത്തരമാണെന്നും, തിങ്കള്, ബുധന് ദിവസങ്ങളിലാണ് റിയാലിറ്റി ഷോയുടെ ഷൂട്ടിംഗ് നടക്കുന്നതെന്നും ഷാനവാസ് വ്യക്തമാക്കുന്നു. മറ്റുള്ളവര് ഷൂട്ടിംഗിനായി അതിരാവിലെ മുതല് കാത്തിരുന്നാലും ലക്ഷ്മിനായര് എത്തുമ്പോഴേക്കും 12 മണി കഴിഞ്ഞിരിക്കും.
വിദ്യാര്ത്ഥിയായിരുന്ന താന് അവസാന വര്ഷ പരീക്ഷയെത്തുടര്ന്ന് ഷൂട്ടിംഗ് മറ്റൊരു ദിവസത്തേക്ക് മാറ്റാന് ആവശ്യപ്പെട്ടതോടെയാണ് ലക്ഷ്മിനായരുടെ മറ്റൊരു മുഖം താന് കാണുന്നത്. പരീക്ഷ വേണമെങ്കില് അരിയറായി എഴുതാം ഷൂട്ടിംഗ് മാറ്റിവയ്ക്കാനാവില്ലെന്ന് ലക്ഷ്മി നായര് തറപ്പിച്ചു പറഞ്ഞു. ഒടുവില് താന് ഷോയില് നിന്നും വിട്ടുപോകാന് തീരുമാനിച്ചപ്പോഴും ഭീഷണിയുമായി ലക്ഷ്മി നായരെത്തി. വിട്ടു പോകുകയാണെങ്കില് അടുത്ത എപ്പിസോഡില് കയ്യില് ബാന്ഡേജ് ചുറ്റി വരണമെന്നാവശ്യപ്പെട്ടു. പ്രേക്ഷകരെ തെറ്റിദ്ധരിപ്പിക്കുന്നതിന് വേണ്ടിയായിരുന്നു ഇത്. എന്നാല് താന് ഇത് നിരസിച്ചതോടെ ഫോണില് വിളിച്ച് വീണ്ടും ഭീഷണിപ്പെടുത്തി. അടുത്ത എപ്പിസോഡില് അവര് ആ ഭീഷണി നടപ്പാക്കുകയും ചെയ്തു. ഷാനവാസ് ഒരു മോശം മത്സരാര്ഥിയാണെന്ന് പ്രേക്ഷകര് ചാനലിനെ അറിയിക്കുന്നു അതിനാല് ഷോയില് നിന്നും പുറത്താക്കുന്നു എന്ന് പറഞ്ഞ് പ്രേക്ഷകരെയും തന്നെയും അവര് വീണ്ടും ചതിച്ചെന്നും ഷാനവാസ് തന്റെ വീഡിയോയിലൂടെ കുറ്റപ്പെടുത്തുന്നു.
ഇവര് ഒരു പാചക വിദഗ്ദയാണെങ്കില് എന്തുകൊണ്ട് മറ്റുചാനലുകളിലൊന്നും ഇവര് പ്രത്യക്ഷപ്പെടുന്നില്ല എന്ന ചോദ്യത്തോടെയാണ് ഷാനവാസ് തന്റെ വീഡിയോ അവസാനിപ്പിക്കുന്നത്.
https://www.youtube.com/watch?v=R5m1CaDPvJg
Discussion about this post