ഷിഗ്ഗോൺ: കോൺഗ്രസിനെതിരെ ആക്രമണം കടുപ്പിച്ച് കർണാടകയിൽ ബിജെപി ദേശീയ അദ്ധ്യക്ഷൻ ജെപി നദ്ദയുടെ തിരഞ്ഞെടുപ്പ് പ്രചാരണം. കമ്മീഷൻ, കറപ്ഷൻ, ക്രിമിനലൈസേഷൻ എന്ന നിലയിലേക്ക് ഗ്രാൻഡ് ഓൾഡ് പാർട്ടി കൂപ്പുകുത്തിയെന്ന് നദ്ദ വിമർശിച്ചു. ഷിഗ്ഗോണിൽ കന്നഡ നടൻ കിച്ച സുദീപ് പങ്കെടുത്ത വേദിയിലായിരുന്നു ജെപി നദ്ദയുടെ വാക്കുകൾ.
കർണാടകയിലെ ജനങ്ങളുടെ ആവേശം ബിജെപി സർക്കാരിനെ തിരിച്ചെത്തിക്കുമെന്നാണ് വ്യക്തമാകുന്നതെന്ന് ജെപി നദ്ദ പറഞ്ഞു. കർണാടകയുടെ മുക്കിനും മൂലയിലും വികസനം എത്തുന്നുവെന്ന് ഉറപ്പിക്കാൻ ബിജെപിക്ക് വോട്ട് ചെയ്യണമെന്നും അദ്ദേഹം ജനങ്ങളോട് അഭ്യർത്ഥിച്ചു.
മുഖ്യമന്ത്രി ബസവരാജ് ബൊമ്മെ ആണ് ഷിഗ്ഗോണിലെ ബിജെപി സ്ഥാനാർത്ഥി. ബിജെപി സർക്കാരിന് കീഴിൽ കർണാടക അഭിവൃദ്ധിപ്പെടുകയാണ്. രാജ്യത്തെ ഏറ്റവും മികച്ച നേരിട്ടുളള വിദേശനിക്ഷേപ കേന്ദ്രങ്ങളിലൊന്നായി കർണാടക മാറിയെന്നും നദ്ദ ചൂണ്ടിക്കാട്ടി.
വികസനത്തിന് വേണ്ടിയുളള കുതിപ്പിൽ കർണാടകയെ പിന്നാക്കം പോകാൻ അനുവദിക്കരുതെന്നും താമരയുടെയും ബിജെപിയുടെയും വിജയം ഉറപ്പുവരുത്തണമെന്നും നദ്ദ പറഞ്ഞു. നദ്ദയുടെ റോഡ് ഷോയിലും പൊതുസമ്മേളനത്തിലും ആയിരങ്ങളാണ് പങ്കെടുത്തത്.
Discussion about this post