ഗ്രീന്‍ ടീ , ബ്ലാക്ക് ടീ ബ്ലൂ ടീ അങ്ങനെ ടീകള്‍ പല വിധമാണ് എന്നാല്‍ വൈറ്റ് ടീയെക്കുറിച്ച് അധികമാരും കേട്ടിരിക്കാനിടയില്ല. വളരെ പ്രയോജനങ്ങളുള്ള ഒന്നാണ് വൈറ്റ് ടീ. എന്താണിത്, എങ്ങനെയാണിത് നിര്‍മ്മിക്കുന്നത്. എന്തൊക്കെയാണ് പ്രയോജനങ്ങള്‍ എന്നൊക്കെ അറിയാം.
ഇളം മഞ്ഞ നിറത്തിലുള്ള ചായയാണ് വൈറ്റ് ടീ. തേയില നാമ്പുകള്‍ വിടരും മുന്‍പ് അതിലെ വെള്ള നാരുകള്‍ നിലനില്‍ക്കെ തന്നെ ശ്രദ്ധാപൂര്‍വം നുള്ളി, നേരിട്ട് വെയിലത്തിട്ട് ഉണക്കി പൊടിച്ചെടുക്കുന്ന തേയിലയാണ് ഇത്. തേയിലയുടെ കടുപ്പം കൂട്ടാന്‍ കൃത്രിമ രാസവസ്തുക്കള്‍ ഉപയോഗിക്കുന്നില്ല എന്ന് മാത്രമല്ല, ഇതിന്റെ നിര്‍മാണത്തില്‍ പ്രോസസിങ്ങും വളരെ കുറവാണ്.
ചായപ്പൊടി, ഗ്രീന്‍ ടീ എന്നിവയെ താരതമ്യം ചെയ്യുമ്പോള്‍ വളരെ കുറഞ്ഞ അളവില്‍ മാത്രമേ ഇതില്‍ കഫീന്‍ അടങ്ങിയിട്ടുള്ളൂ. മറ്റു ചായകള്‍ക്കുള്ളതു പോലെയുള്ള ചവര്‍പ്പില്ല എന്ന് മാത്രല്ല, നേരിയ മധുരവുമുണ്ട്.
വൈറ്റ് ടീയില്‍, കാറ്റെച്ചിന്‍സ്(catechins) എന്ന് വിളിക്കപ്പെടുന്ന ഒരു തരം പോളിഫെനോള്‍ അടങ്ങിയിട്ടുണ്ട്. ശരീരത്തിനുള്ളില്‍ ആന്റിഓക്സിഡന്റുകളായി പ്രവര്‍ത്തിക്കുന്ന സസ്യാധിഷ്ഠിത തന്മാത്രകളാണ് പോളിഫെനോള്‍. ഇവ ഫ്രീ റാഡിക്കലുകളെ ചെറുക്കുകയും കോശങ്ങളെ കേടുപാടുകളില്‍ നിന്നു സംരക്ഷിക്കുകയും ചെയ്യുന്നു. കൂടാതെ, ഹൃദ്രോഗ സാധ്യത കുറയ്ക്കാനും ഇതിനു കഴിവുണ്ടെന്നാണ് പഠനം.
കൊഴുപ്പ് കത്തിക്കുന്ന കാര്യത്തില്‍ മുന്നിലാണ് വൈറ്റ് ടീയുടെ സ്ഥാനം. അതു കൂടാതെ, ഇത് ദഹനം 4-5% കൂട്ടുന്നതിനാല്‍ ശരീരഭാരം കുറയ്ക്കാനും സഹായിക്കുമെന്ന് തെളിഞ്ഞിട്ടുണ്ട്. കാറ്റെച്ചിനുകള്‍ പല്ലുകളില്‍ ഉണ്ടാകുന്ന ബാക്ടീരിയയുടെ വളര്‍ച്ച തടഞ്ഞ്, പോടുകള്‍ ഉണ്ടാകുന്നത് തടയും.
വന്‍കുടലിലെ കാന്‍സര്‍ കോശങ്ങളുടെ വളര്‍ച്ച തടയുന്നതായി മറ്റൊരു പഠനം പറയുന്നു. കൂടാതെ ടൈപ്പ് 2 പ്രമേഹം, ഹൃദ്രോഗം, മെറ്റബോളിക് സിന്‍ഡ്രോം എന്നിവയുള്‍പ്പെടെ പല വിട്ടുമാറാത്ത ആരോഗ്യ പ്രശ്‌നങ്ങളും ഉണ്ടാക്കുന്ന ഇന്‍സുലിന്‍ പ്രതിരോധം തടയാന്‍ പോളിഫെനോള്‍ പോലെയുള്ള തന്മാത്രകള്‍ക്ക് കഴിവുള്ളതായും ഗവേഷകര്‍ കണ്ടെത്തിയിട്ടുണ്ട്.
Discussion about this post