ഡൽഹി: കേന്ദ്ര സർക്കാർ കൊണ്ടു വന്ന പുതിയ ഐടി നിയമങ്ങൾ പാലിക്കണമെന്ന് കാട്ടി ഡൽഹി ഹൈക്കോടതി ട്വിറ്ററിന് നോട്ടീസയച്ചു. രാജ്യത്ത് പുതിയ നിയമങ്ങൾ നിലനിൽക്കുന്ന സാഹചര്യത്തിൽ അവ പാലിക്കണമെന്ന് കോടതി ട്വിറ്ററിനോട് ആവശ്യപ്പെട്ടു.
പരാതികൾ സമർപ്പിക്കാൻ സാമൂഹിക മാധ്യമങ്ങൾ പ്രത്യേക ഓഫിസറെ നിയമിക്കണമെന്ന ചട്ടങ്ങൾ ട്വിറ്റർ പാലിക്കുന്നില്ലെന്നും വെബ്സൈറ്റിൽ ഇതുസംബന്ധിച്ച വിവരങ്ങളില്ലെന്നും ചൂണ്ടിക്കാട്ടി അഡ്വ. അമിത് ആചാര്യ സമർപ്പിച്ച ഹർജിയിലാണ് കോടതിയുടെ നിർദ്ദേശം. പരാതിപരിഹാര ഉദ്യോഗസ്ഥനായി യു.എസ് സ്വദേശിയെ നിയമിച്ചിട്ടുണ്ടെന്നും എന്നാൽ പുതിയ ചട്ടങ്ങൾ പ്രകാരം ഇതു മതിയാകില്ലെന്നും ഹർജിക്കാരൻ ചൂണ്ടിക്കാട്ടുന്നു.
പുതിയ ഐ.ടി നിയമപ്രകാരമുള്ള മാറ്റങ്ങൾ നടപ്പാക്കാൻ മേയ് 25 വരെയായിരുന്നു കേന്ദ്ര സർക്കാർ സാമൂഹിക മാധ്യമങ്ങൾക്ക് സമയം അനുവദിച്ചിരുന്നത്. മൂന്നുമാസത്തെ സമയമാണ് അനുവദിച്ചിരുന്നത്. എന്നാൽ, ട്വിറ്റർ ഇക്കാര്യത്തിൽ തീരുമാനമെടുത്തിരുന്നില്ല.
Discussion about this post