മുംബൈ: ഷാരൂഖ് ഖാൻ നായകനായ പത്താൻ സിനിമയുമായി ബന്ധപ്പെട്ട് നടത്തിയ അഭിപ്രായത്തെ വർഗ്ഗീയ പരാമർശമായി വളച്ചൊടിച്ച യുവനടി ഉർഫി ജാവേദിന് മറുപടി നൽകി കങ്കണ റണാവത്. ഭാരതത്തിലെ എല്ലാവരും തുല്യരാകാൻ ഏകീകൃത സിവിൽ കോഡ് തന്നെ നടപ്പിലാക്കണമെന്ന് കങ്കണ പറഞ്ഞു. കലയെ ഒരിക്കലും മതത്തിന്റെ പേരിൽ വേർതിരിക്കരുതെന്നും, അഭിനേതാക്കൾ എന്ന ഒറ്റമതം മാത്രമാണ് നമുക്ക് ഉള്ളതെന്നുമായിരുന്നു ഉർഫി ജാവേദിന്റെ പരാമർശം.
പത്താൻ സിനിമയ്ക്ക് ലഭിക്കുന്ന വലിയ സ്വീകാര്യതയെക്കുറിച്ച് പരാമർശിച്ചുകൊണ്ടായിരുന്നു ട്വിറ്ററിലൂടെയുള്ള കങ്കണയുടെ ആദ്യ പ്രതികരണം. ഇന്ത്യയിൽ ഖാൻമാർക്ക് ഖാൻ മാരോട് മാത്രമാണ് സ്നേഹമുള്ളത്. ഇതിന് പുറമേ മുസ്ലീം നടികളോട് അഭിനിവേശവുമുണ്ട്. ഇന്ത്യ പോലൊരു രാജ്യത്ത് ഈ വേർതിരിവ് അത്ര നല്ലതായി തോന്നുന്നില്ല. ഫാസിസവും വെറുപ്പും നല്ലതല്ല . ഭാരതം പോലെ മറ്റൊരു രാജ്യം വേറെയില്ലെന്ന് ഓർക്കുകയെന്നും കങ്കണ ട്വിറ്ററിൽ കുറിച്ചിരുന്നു. എന്നാൽ തൊട്ട് പിന്നാലെ ഇതിന് മറുപടിയുമായി ഉർഫി ജാവേദ് രംഗത്ത് എത്തുകയായിരുന്നു.
രാജ്യത്തെ നടീ നടന്മാരെ കങ്കണ ഹിന്ദു അഭിനേതാവ് മുസ്ലീം അഭിനേതാവ് എന്നിങ്ങനെ തിരിച്ചിരിക്കുന്നു. കല ഒരിക്കലും മതത്തിന്റെ പേരിൽ വിഭജിക്കേണ്ട ഒന്നല്ല. എല്ലാവരും അഭിനേതാക്കളാണ് എന്നും ഉർഫി പ്രതികരിച്ചു. ഉർഫി ഈ പറഞ്ഞ കാര്യം യാഥാർത്ഥ്യമാകാൻ ഏകീകൃത സിവിൽ കോഡ് രാജ്യത്ത് നടപ്പിലാക്കേണ്ടത് ഉണ്ടെന്നായിരുന്നു കങ്കണയുടെ മറുപടി.
ഉർഫി പറഞ്ഞതുപോലെയൊരു ഭാരതമാണ് നമുക്ക് വേണ്ടത്. എന്നാൽ ഏകീകൃത സിവിൽ കോഡ് ഉണ്ടെങ്കിൽ മാത്രമേ ഇത് സാദ്ധ്യമാകൂ. ഏകീകൃത സിവിൽ കോഡ് രാജ്യത്ത് നടപ്പിലാക്കാൻ നമുക്ക് പ്രധാനമന്ത്രിയോട് ആവശ്യപ്പെടാം. ഒപ്പമുണ്ടാകുമോയെന്നും കങ്കണ ചോദിച്ചു.
Discussion about this post