കളഹന്തി വീണ്ടും ആവര്‍ത്തിക്കപ്പെടുന്നു. ഇതിന് ഒടുവിലത്തെ ഉദാഹരണമാണ് കൃത്യ സമയത്ത് ആംബുലന്‍സ് സൗകര്യം ലഭിക്കാതെ കര്‍ണാടകയില്‍ മരിച്ച യുവതി. അസുഖം മൂര്‍ച്ഛിച്ച മകളെ ആശുപത്രിയില്‍ കൊണ്ടുപോകാന്‍ ആംബുന്‍സ് ലഭിക്കാതെ, മറ്റൊരും വഴിയും ഇല്ലാതെ വന്നപ്പോള്‍ മകളെ മോട്ടോര്‍ സൈക്കിളില്‍ കിടത്തി ആറ് കിലോമീറ്റര്‍ ദൂരെയുള്ള പ്രാഥമിക ആരോഗ്യ കേന്ദ്രത്തിലേക്ക് കൊണ്ടുപോകാന്‍ നിര്‍ബന്ധിതനായി തിമ്മപ്പ എന്ന മധ്യവയസ്‌കന്‍.
വിദഗ്ധ ചികിത്സയ്ക്കായി മെച്ചപ്പെട്ട ആശുപത്രിയിലേക്ക് കൊണ്ടുപോകാന്‍ പ്രാഥമികാരോഗ്യ കേന്ദ്രത്തിലെ അധികൃതര്‍ നിര്‍ദ്ദേശിച്ചെങ്കിലും ഗതാഗത സൗകര്യമില്ല. ഇതിനിടെ യുവതി മരിച്ചു. ആശുപത്രി അധികൃതരുടെ ശ്രദ്ധക്കുറവും അനാസ്ഥയുമാണ് മകളുടെ മരണത്തിന് കാരണമെന്ന് പെണ്‍കുട്ടിയുടെ പിതാവ് ആരോപിക്കുന്നു.
20 വയസ്സുള്ള രത്‌നമ്മയാണ് കൃത്യ സമയത്ത് ചികിത്സ ലഭിക്കാതെ മരണപ്പെട്ടത്. ബെംഗലൂരുവില്‍ നിന്നും 150 കീമീ അകലെയുള്ള മധുഗിരി സ്വദേശിയായ രത്‌നമ്മയ്ക്ക് പനിയും ശ്വാസ തടസ്സവും നേരിട്ടതിനെ തുടര്‍ന്ന് ആറ് കീമീ ദൂരം മോട്ടോര്‍ സൈക്കിളില്‍ കിടത്തിയാണ് അച്ഛനും സഹോദരനും ചേര്‍ന്ന് അടുത്തുള്ള പ്രാഥമിക ആരോഗ്യ കേന്ദ്രത്തില്‍ എത്തിച്ചത്. മരുന്നുകളുമായി വീട്ടിലേക്ക് പിന്നീട് മടങ്ങിയെങ്കിലും രത്‌നമ്മയുടെ നില വഷളായതിനാല്‍ 21 കീമീ അകലെയുള്ള ആശുപത്രിയിലേക്ക് ആംബുലന്‍സ് വിളിച്ചു. ആംബുലന്‍സ് എത്താതിരുന്നതിനാല്‍ അടുത്തുള്ള സ്വകാര്യ ഡോക്ടറുടെ അടുക്കല്‍ എത്തിച്ചെങ്കിലും രത്‌നമ്മയുടെ നില ഗുരുതരമായി തുടര്‍ന്നു. വീണ്ടും ആംബുലന്‍സ് വിളിച്ചെങ്കിലും നിരാശയായിരുന്നു ഫലമെന്ന് രത്‌നമ്മയുടെ പിതാവ് തിമ്മപ്പ മാധ്യമങ്ങളോട് പറഞ്ഞു. രത്‌നമ്മയുടെ നില അതീവ ഗുരുതരമായതിനെ തുടര്‍ന്ന് പ്രാഥമിക ആരോഗ്യ കേന്ദ്രത്തില്‍ എത്തിച്ചെങ്കിലും അപ്പോഴേക്കും രത്‌നമ്മ മരിച്ചിരുന്നു. മൃതദേഹം വീട്ടിലേക്ക് എത്തിക്കാന്‍ വാഹന സൗകര്യം അഭ്യര്‍ത്ഥിച്ചെങ്കിലും ഡോക്ടര്‍ കൈമലര്‍ത്തിയെന്ന് തിമ്മപ്പനും രത്‌നമ്മയുടെ സഹോദരനും പറയുന്നു. മോട്ടോര്‍ സൈക്കിളില്‍ കിടത്തിയാണ് രത്‌നമ്മയുടെ മൃതദേഹം വീട്ടിലെത്തിച്ചത്.
25 കീമീ അകലെയുള്ള മധുഗിരി ആശുപത്രിയിലേക്ക് നിരന്തരം ആംബുലന്‍സ് ആവശ്യപ്പെട്ടെങ്കിലും ആശുപത്രി അധികൃതര്‍ കാണിച്ച അനാസ്ഥയാണ് ചികിത്സ വൈകിപ്പിച്ചതെന്ന് രത്‌നമ്മയുടെ ബന്ധുക്കള്‍ ആരോപിക്കുന്നു. ടാക്‌സിയില്‍ രത്‌നമ്മയെ ആശുപത്രിയില്‍ എത്തിക്കാന്‍ ശ്രമിച്ചെങ്കിലും 3000 രൂപയാണ് കൂലിയായി ഡ്രൈവര്‍ ആവശ്യപ്പെട്ടത്. മുല്ലപ്പൂ കച്ചവടക്കാരാനായ തന്റെ കയ്യില്‍ ആകെ 150 രൂപ മാത്രമുണ്ടായിരുന്നുള്ളൂ എന്നും തിമ്മപ്പന്‍ പറയുന്നു. മറ്റൊരു വഴിയില്ലാതെ വന്നപ്പോഴാണ് മോട്ടോര്‍ സൈക്കിളില്‍ മകളെ ആശുപത്രിയിലേക്ക് എത്തിക്കാന്‍ ശ്രമിച്ചതെന്നും തിമ്മപ്പന്‍ മാധ്യമങ്ങളോട് പറഞ്ഞു.
ആശുപത്രി അധികൃതരില്‍ നിന്നും ലഭിച്ച ദുരനുഭവങ്ങള്‍ അറിയിക്കാന്‍ ആരോഗ്യകുടുംബക്ഷേമ മന്ത്രി കെ ആര്‍ രമേശ് കുമാറിനെ സമീപിച്ചപ്പോള്‍ മന്ത്രിയുടെ പേഴ്‌സണല്‍ സെക്രട്ടറി ആട്ടിപായിച്ചെന്നും ബന്ധുക്കള്‍ ആരോപിക്കുന്നു. എന്നാല്‍ തിമ്മപ്പന്‍ ആംബുലന്‍സ് ആവശ്യപ്പെട്ടിട്ടേ ഇല്ലെന്നാണ് ആശുപത്രീ അധികൃതരുടെ വാദം. പ്രാഥമിക ആരോഗ്യ കേന്ദ്രത്തില്‍ എത്തിച്ച രത്‌നമ്മയെ പരിശോധിക്കാന്‍ ഡോക്ടര്‍മാര്‍ ഉണ്ടായിരുന്നില്ലെന്നും ആരോപണമുയരുന്നുണ്ട്.
Discussion about this post