മുംബൈ: മുസ്ലിം പള്ളികളില്‍ ലൗഡ് സ്പീക്കറിലൂടെ ബാങ്ക് വിളിക്കുന്നതിനെതിരെയുള്ള അതൃപ്തിയില്‍ ഉറച്ചു നില്‍ക്കുന്നുവെന്ന് പ്രമുഖ ബോളീവുഡ് ഗായകന്‍ സോനു നിഗം. സോനുവിനെതിരെ സോഷ്യല്‍ മീഡിയയില്‍ ട്രോളുകള്‍ സജീവമാകുന്നതിനിടയിലാണ് ഗായകന്റെ പുതിയ ട്വീറ്റ്. ബുദ്ധിയില്ലാത്തവരാണ് തന്റെ നിലപാടിനെ വിമര്‍ശിക്കുന്നതെന്ന് സോനു നിഗം പറഞ്ഞു. അഭിപ്രായസ്വാതന്ത്ര്യം ചോദ്യം ചെയ്തവരെയും അദ്ദേഹം വിമര്‍ശിച്ചു.
കഴിഞ്ഞ ദിവസമാണ് മുസ്ലീം പള്ളികളില്‍ നിന്നുള്ള ബാങ്കുവിളിക്കെതിരെയുള്ള അതൃപ്തി സോനു നിഗം വെളിപ്പെടുത്തിയത്.
എല്ലാവരെയും ദൈവം അനുഗ്രഹിക്കട്ടെ. ഞാനൊരു മുസ്ലീമല്ല. എന്നിട്ടും എനിക്ക് പുലര്‍ച്ചെ ഉറങ്ങിയെണീക്കേണ്ടി വരുന്നു. എന്നാണീ നിര്‍ബന്ധിത മതവികാരപ്രകടനം അവസാനിപ്പിക്കേണ്ടിവരിക. മുഹമ്മദ് നബി ഇസ്ലാം മതം സ്ഥാപിക്കുമ്പോള്‍ വൈദ്യുതി ഇല്ലായിരുന്നു. എഡിസണ് ശേഷം പിന്നെന്തിനാണീ കോലാഹലം എന്നായിരുന്നു സോനു നിഗമിന്റെ ആദ്യ ട്വീറ്റ്.
മത അനുയായി അല്ലാത്ത ഒരാളെ വൈദ്യുതി ഉപയോഗിച്ച് വിളിച്ചുണര്‍ത്തുന്ന ക്ഷേത്രങ്ങളോടോ ഗുരുദ്വാരകളോടോ തനിക്ക് വിശ്വാസമില്ലെന്നും സോനു നിഗം വ്യക്തമാക്കി.
Discussion about this post