ന്യൂയോർക്ക്: വാനാക്രൈ എന്ന റാൻസംവേർ നിയന്ത്രണ വിധേയമായെങ്കിലും കൂടുതൽ അപകടകാരിയായ പുതിയ മാൽവേർ പ്രോഗ്രാമുകൾ പുറത്തുവരുന്നതായി ഗവേഷകർ. ഇറ്റേണൽറോക്സ് എന്ന പേരിലുള്ള മാൽവേറാണ് പ്രതിസന്ധി സൃഷ്ടിക്കാൻ എത്തുന്നത്.
വാനാക്രൈ പ്രോഗ്രാമിന്റെ സൃഷ്ടിക്ക് കാരണമായ അതേ തകരാറുകൾ ഉപയോഗിച്ചാണ് പുതിയ പ്രോഗ്രാമും തയാറാക്കിയിരിക്കുന്നത്. വാനാക്രൈ വഴിതെളിച്ചതു വിൻഡോസിൽ ഉണ്ടായ എംഎസ് 17-010 എന്നൊരു തകരാറാണ്. ഈ തകരാർ അമേരിക്കൻ രഹസ്യാന്വേഷണ വിഭാഗം മുമ്പേ കണ്ടെത്തിയിരുന്നു. എന്നാൽ മൈക്രോസോഫ്റ്റിനെ അത് അറിയിക്കാതെ നാഷണൽ സെക്യൂരിറ്റി ഏജൻസി (എൻഎസ്എ) സൂക്ഷിച്ചു. നുഴഞ്ഞുകയറ്റക്കാർ അത് അവിടെനിന്നു മോഷ്ടിക്കുകയായിരുന്നു.
എൻഎസ്എയിൽ നിന്നു ചോർത്തിയ രണ്ട് തകരാറുകൾ ഉപയോഗിച്ചാണ് വാനാക്രൈ പ്രോഗ്രാം തയാറാക്കിയത്. എന്നാൽ ഇറ്റേണൽറോക്സ് ഉപയോഗിക്കുന്നത് ഏഴോളം പിഴവുകളാണ്. അതിനാൽ ഇറ്റേണൽറോക്സ് കൂടുതൽ അപകടകാരിയാകും എന്നാണ് വിദഗ്ധർ പറയുന്നത്.
Discussion about this post