മലയാളത്തില്‍ 100 കോടി ബോക്‌സ് ഓഫീസിലെത്തിച്ച് സര്‍വ്വകാല റെക്കോര്‍ഡ് സ്വന്തമാക്കിയ മോഹന്‍ലാലിന്റെ വൈശാഖ് ചിത്രം ‘പുലിമുരുകന്റെ’ തമിഴ് പതിപ്പ് തീയേറ്ററുകളിലെത്തുന്നു. ചിത്രം ജൂണ്‍ 16ന് തീയേറ്ററുകളിലെത്തും. ‘പുലിമുരുകന്‍’ എന്നുതന്നെ തമിഴിലും പേരുള്ള ചിത്രത്തിന്റെ ട്രെയ്‌ലര്‍ പുറത്തെത്തി.
തമിഴ് പതിപ്പിന്റെ എല്ലാ ജോലികളും മാസങ്ങള്‍ക്ക് മുന്‍പേ പൂര്‍ത്തിയായതാണ്. മോഹന്‍ലാല്‍ തന്നെയാണ് തമിഴിലും ഡബ്ബ് ചെയ്തിരിക്കുന്നത്. ആര്‍.പി.ബാലയാണ് തമിഴില്‍ സംഭാഷണങ്ങള്‍ എഴുതിയിരിക്കുന്നത്. മുളകുപാടം ഫിലിംസാണ് തമിഴ് ചിത്രവും വിതരണം ചെയ്യുന്നത്. വമ്പന്‍ റിലീസിന് പദ്ധതിയില്ലെന്നും നൂറ് തീയേറ്ററിനടുത്തെ തമിഴില്‍ ചിത്രം എത്തിക്കുന്നുള്ളുവെന്നും ടോമിച്ചന്‍ മുളകുപാടം ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തില്‍ പറഞ്ഞിരുന്നു.
മലയാളം റിലീസിന് ശേഷം തെലുങ്കില്‍ ‘മന്യംപുലി’ എന്ന പേരില്‍ റിലീസ് ചെയ്തപ്പോഴും ചിത്രത്തിന് മികച്ച പ്രതികരണമാണ് ലഭിച്ചത്. റിലീസ് ദിന കളക്ഷനില്‍ പുലിമുരുകനെ മറികടക്കുകയും ചെയ്തിരുന്നു ‘മന്യംപുലി’. പുലിമുരുകന്‍ ആദ്യദിനം നേടിയത് 4.06 കോടിയാണെങ്കില്‍ മന്യംപുലി 5 കോടിക്ക് മേല്‍ കളക്ഷന്‍ നേടി.
Discussion about this post