നമ്മൾ ഓൺലൈൻ ചെയ്യുന്ന കാര്യങ്ങൾ മറ്റുള്ളവർ ശ്രദ്ധിക്കുന്നത് തന്നെ എത്രയോ അരോചകമാണ് ? എന്നാൽ നിങ്ങളായിട്ടു തന്നെ നിങ്ങളെ ശ്രദ്ധിക്കുവാൻ വേണ്ടി ക്ഷണം കൊടുത്ത് ഇരുത്തിയിട്ടുണ്ടെങ്കിൽ ? അത്തരമൊരു പ്രശ്നമാണ് ഇപ്പോൾ ഓൺലൈൻ ലോകത്ത് പ്രധാന ചർച്ച വിഷയമായി സജീവമായിരിക്കുന്നത് .
ഗൂഗിൾ ക്രോം , മോസില്ല ഫയർഫോക്സ് എന്നിവയിൽ ഇൻസ്റ്റാൾ ചെയ്തിരിക്കുന്ന പ്ലഗിനാണ് വില്ലനായി വന്നിരിക്കുന്നത് . നമ്മുടെ സൗകര്യത്തിനായി ഉടനടി കാര്യങ്ങൾ ചെയ്തെടുക്കുന്നതിനു വേണ്ടിയാണ് പ്രധാനമായും പ്ലഗിൻസ് , എക്സ്റ്റൻഷൻസ് എന്നിവ പ്രധാന വിഷയങ്ങൾ വരെ കൈകാര്യം ചെയ്യുന്ന ബ്രൗസറിൽ ഇൻസ്റ്റാൾ ചെയ്തു വെയ്ക്കുന്നത് . ഇത്തരം പ്ലഗിൻസ് വഴി നമ്മൾ സന്ദർശിക്കുന്ന വെബ്സൈറ്റ് മുതൽ നമ്മൾ ടൈപ്പ് ചെയ്യുന്ന വാക്കുകൾ പോലും ഇവർക്ക് ലഭ്യമാകുന്നു .
ഇത്തരം സൗകര്യങ്ങൾ നമുക്ക് ലഭ്യമാക്കുന്നത് കൂടുതലും ബ്രൗസർ കമ്പനികൾക്കു പുറമെയുള്ള ഡെവലപ്പേഴ്സ് വഴിയാണ് . അതിനാൽ തന്നെ ഔദ്യോഗികമായ പ്ലഗിൻസ് വിരളവുമാണ് . അതിനാൽ തന്നെ സുരക്ഷയുടെ കാര്യത്തിൽ വളരെയധികം ശ്രദ്ധിക്കേണ്ടിയിരിക്കുന്നു ഓരോ വ്യക്തിയും .
സുരക്ഷാരംഗത്തെ പ്രമുഖ കേന്ദ്രം ഇത്തരം എക്സറ്റന്ഷനുകൾ ഉപയോഗിക്കുന്നവർക്ക് മുന്നറിയിപ്പുമായി രംഗത്ത് വന്നിരിക്കുകയാണ് . രണ്ടു ബ്രൗസറുകളിലും ഏറ്റവുമധികം ആളുകൾ ഉപയോഗിക്കുന്ന ( ഏകദേശം 1.8 മില്യൺ ) Stylish യെന്ന പ്ലഗിനാണ് ഇവിടെ വില്ലനായി അവർ പ്രഖ്യാപിച്ചിരിക്കുന്നത് . ഈ പ്ലഗിൻ പ്രധാനമായും നമ്മൾ ഉപയോഗിക്കുന്ന ബ്രൌസർ കൂടുതൽ ആകർഷകമായി തോന്നിപ്പിക്കുവാനായി ഡിസൈൻ ചേർക്കുന്നതിനായിട്ടാണ് ഉപയോഗിച്ച് വന്നിരുന്നത് . എന്നാൽ ഈ പ്ലഗിൻ വഴി ഇത് ഉപയോഗിക്കുന്ന വ്യക്തികളുടെ വിവരങ്ങൾ ചോർത്തിയെടുക്കപ്പെടുന്നു . ഇതുവഴി സിസ്റ്റം ഹാക്ക് ചെയ്യുന്നതിനും , വ്യക്തികളെ ബ്ളാക്മെയിൽ ചെയ്യുന്നതിനും അവർ ശ്രമം നടത്തുന്നുവെന്ന് സുരക്ഷാകേന്ദ്രങ്ങൾ വെളിപ്പെടുത്തുന്നു .
ഇത്തരമൊരു പ്രശ്നം പുറത്ത് വന്നതോടെ പ്രമുഖ ബ്രൗസർ കമ്പനികൾ ഈ പ്ലഗിൻ തങ്ങളുടെ സ്റ്റോറിൽ നിന്നും നീക്കം ചെയ്തിട്ടുണ്ട് .
Discussion about this post