തൊടുപുഴ: കുമളിയില് രണ്ടാനമ്മയുടെയും പിതാവിന്റെയും ക്രൂരമര്ദനത്തിനിരയായി ജീവിതത്തിലേക്കു തിരിച്ചെത്തിയ ഷഫീക്കിനു മെഗാസ്റ്റാര് മമ്മുട്ടിയെത്തി. ഇന്നലെ രാവിലെയാണു ചികിത്സയില് കഴിയുന്ന ഷഫീഖിനെ കാണാന് മമ്മൂട്ടി അല്അസ്ഹര് മെഡിക്കല് കോളജ് സൂപ്പര് സ്പെഷാലിറ്റി ആശുപത്രിയിലെത്തിയത്.കൈനിറയെ സമ്മാനവുമായെത്തിയ താരം കുട്ടിയെ കെട്ടിപ്പുണര്ന്നു.
കമല് സംവിധാനം ചെയ്യുന്ന ഉട്ട്യോപ്യയിലെ രാജാവെന്ന സിനിമയുടെ ലൊക്കേഷനില് നിന്നായിരുന്നു വന്നത്. മെഡിക്കല് കോളജിലെ വിദ്യാര്ഥികളും ഡോക്ടര്മാരും ആശുപത്രി ജീവനക്കാരും മാനേജ്മെന്റും ചേര്ന്ന് അദ്ദേഹത്തെ വരവേറ്റു. രോഗവിവരങ്ങള് ഡോ.കെ.പി. ഷിയാസിനോട് ചോദിച്ചറിഞ്ഞു.
ഇതിനിടെ ഷഫീക്കിന്റെ പ്രതികരണം മമ്മൂട്ടിയെ അത്ഭുതപ്പെടുത്തി. വല്യേട്ടന്,പഴശിരാജ സിനിമകളിലെ ഡയലോഗുകള് കട്ടിലില് കിടന്ന് കുട്ടി അഭിനയിച്ച് കാണിച്ചതോടെയാണിത്. തുടര്ന്നു വാത്സല്യത്തോടെ സമ്മാനങ്ങളും പുത്തനുടുപ്പുകള് വാങ്ങാനുള്ള പണവും കൈമാറി. ആശുപത്രി ചെയര്മാന് കെ.എം. മൂസ, മാനേജിങ് ഡയറക്ടര് കെ.എം. മിജാസ് എന്നിവരോടു കുട്ടിയെ ഏറ്റെടുക്കാന് കാണിച്ച സന്മനസിന് അദ്ദേഹം നന്ദി പറഞ്ഞു. പോറ്റമ്മയായ രാഗിണിയോട് ഷഫീക്കിന്റെ ഇപ്പോഴത്തെ അവസ്ഥയെക്കുറിച്ച് ചോദിക്കാനും മറന്നില്ല. യാത്ര പറഞ്ഞ് ഇറങ്ങാനൊരുങ്ങുമ്പോള് ഷഫീക്കിന്റെ വക ഒരു ഫഌിംഗ് കിസ്. ഇതേ രീതിയില് മമ്മൂട്ടിയും തിരിച്ചുംനല്കി.
Discussion about this post