ബിർമിംഗ്ഹാം: രോഹിത് ശർമ്മയുടെ സെഞ്ചുറിയുടെ മികവിൽ ബംഗ്ലാദേശിനെതിരായ നിർണ്ണായക ലോകകപ്പ് മത്സരത്തിൽ ഇന്ത്യക്ക് മികച്ച സ്കോർ. ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ നിശ്ചിത 50 ഓവറിൽ 9 വിക്കറ്റ് നഷ്ടത്തിൽ 314 റൺസെടുത്തു.
രോഹിതിന് പുറമെ ഓപ്പണിംഗ് ബാറ്റ്സ്മാൻ ലോകേഷ് രാഹുലും തിളങ്ങിയപ്പോൾ 180 റൺസിന്റെ ഓപ്പണിംഗ് കൂട്ടുകെട്ട് പടുത്തുയർത്താൻ ഇന്ത്യയ്ക്കായി. എന്നാൽ 77 റൺസുമായി രാഹുലും 92 പന്തിൽ 104 റൺസുമായി രോഹിതും പുറത്തായ ശേഷം പിന്നീട് വന്ന ആർക്കും തന്നെ മികച്ച തുടക്കം കാര്യമായി മുതലാക്കാൻ സാധിച്ചില്ല. വിരാട് കോഹ്ലി 26 റൺസുമായി മടങ്ങിയപ്പോൾ വമ്പനടികളിലൂടെ ഋഷഭ് പന്ത് 48 റൺസ് നേടി. മദ്ധ്യനിരയിലെ മറ്റുള്ളവർ വീണ്ടും നിരാശപ്പെടുത്തിയപ്പോൾ മഹേന്ദ്ര സിംഗ് ധോണി 35 റൺസെടുത്തു.
ബംഗ്ലാദേശിനായി മുസ്താഫിസുർ റഹ്മാൻ 10 ഓവറിൽ 59 റൺസ് വഴങ്ങി 5 വിക്കറ്റ് നേടി. ഷാകിബ് അൽ ഹസ്സനും റുബെൽ ഹുസൈനും സൗമ്യ സർക്കാറും ഓരോ വിക്കറ്റ് വീതം നേടി.
Discussion about this post