ലോകമാകെ പടര്‍ന്ന് പിടിച്ച കൊറോണ വൈറസ് ബാധയെ തുടര്‍ന്ന് മൊബൈല്‍ വേള്‍ഡ് കോണ്‍ഗ്രസ് സംഘാടകര്‍ റദ്ദാക്കി. ലോകത്തിലെ ഏറ്റവും വലിയ നൂതന സാങ്കേതിക മേളയാണ് വര്‍ഷത്തിലൊരിക്കല്‍ നടക്കുന്ന മൊബൈല്‍ വേള്‍ഡ് കോണ്‍ഗ്രസ്. വിവരസാങ്കേതിക രംഗത്തെ ഏറ്റവും നൂതനമായ അറിയിപ്പുകളും കണ്ടുപിടുത്തങ്ങളുമായി രാജ്യങ്ങള്‍ ഈ മേളയില്‍ വര്‍ഷാവര്‍ഷം പങ്കെടുക്കാറുണ്ട്. ഈ വര്‍ഷം കൊറോണ വൈറസ് പടര്‍ന്നുപിടിച്ചതിനെ തുടര്‍ന്ന് ഓരോ രാജ്യങ്ങളായി പിന്‍വലിഞ്ഞതോടെയാണ് സംഘാടകര്‍ മേള റദ്ദാക്കിയത്.
മൊബൈല്‍ വിനിമയ രംഗത്തെ പ്രധാന സംഘാടകരായ ഗ്ലോബല്‍ സിസ്റ്റംസ് ആണ് മേള സംഘടിപ്പിക്കാറ്. ഈ വര്‍ഷത്തെ മേള സ്‌പെയിനിലെ ബാഴ്‌സലോണയില്‍ ഫെബ്രുവരി 24 മുതല്‍ 27 വരെ നടക്കാനിരിക്കെയാണ് പരിപാടി റദ്ദാക്കിയതായി സംഘാടകര്‍ അറിയിക്കുന്നത്. ആഗോള വിവര സാങ്കേതിക മേഖലയില്‍ നിന്നും ഒരു ലക്ഷത്തോളം പ്രതിനിധികള്‍ പങ്കെടുക്കാനിരുന്ന മഹാമേളയാണ് വൈറസ് ബാധമൂലം റദ്ദായത്.
Discussion about this post