വാഷിംഗ്ടണ്‍: ഐഎസിന്റെ പരമോന്നത നേതാക്കളില്‍ രണ്ടാമന്‍ അമേരിക്കയുടെ വ്യോമാക്രമണത്തില്‍ കൊല്ലപ്പെട്ടതായി വൈറ്റ്ഹൗസ്. ഹാജി മുതാസ് എന്നറിയപ്പെടുന്ന ഫാദില്‍ അഹമ്മദ് അല്‍ ഹയാലിയാണ് കൊല്ലപ്പെട്ടത്. ഐഎസിന്റെ മാധ്യമവിഭാഗത്തില്‍ പ്രവര്‍ത്തിച്ചിരുന്ന അബു അബ്ദുല്ലയും കൊല്ലപ്പെട്ടു.
വടക്കന്‍ ഇറാഖിലെ മൊസൂളില്‍ കഴിഞ്ഞ 18 ന് നടന്ന വ്യോമാക്രമണത്തിലാണ് ഫാദില്‍ കൊല്ലപ്പെട്ടതെന്ന് വൈറ്റ്ഹൗസ് വക്താവ് നെഡ് പ്രൈസ് അറിയിച്ചു.
ഐഎസിന്റെ ആയുധങ്ങളുടെയും സ്‌ഫോടകവസ്തുക്കളുടെയും നീക്കത്തിനു നേതൃത്വം നല്‍കിയിരുന്നത് ഹാജി മുദസ് ആയിരുന്നെന്നു നെഡ് പ്രൈസ് അറിയിച്ചു. ഇറാഖിലെ ഐഎസിന്റെ പ്രവര്‍ത്തനങ്ങള്‍ നിയന്ത്രിച്ചിരുന്നതും ഹാജി മുദസ് ആയിരുന്നു.
സിറിയയിലെ റാഖയില്‍ കഴിഞ്ഞ മാസം യുഎസ് നടത്തിയ ഡ്രോണ്‍ ആക്രമണത്തില്‍ ഐഎസിന്റെ മറ്റൊരു മുന്‍നിര നേതാവു കൊല്ലപ്പെട്ടിരുന്നു.
ഇയാള്‍ മൊസൂളിലൂടെ വാഹനത്തില്‍ പോകുമ്പാഴായിരുന്നു ആക്രമണം ഉണ്ടായത്. ഇയാള്‍ക്കൊപ്പമുണ്ടായിരുന്ന മറ്റൊരു തീവ്രവാദിയും കൊല്ലപ്പെട്ടു. എന്നാല്‍ സംഭവം ഐഎസ് സ്ഥിരീകരിച്ചിട്ടില്ല.
Discussion about this post