ഹന്ദ്വാര : പാകിസ്ഥാന്‍ പിന്തുണയോടെ കശ്മീര്‍ താഴ്‌വരയില്‍ മയക്കുമരുന്നു വിതരണം ചെയ്യുന്ന ഭീകരസംഘത്തെ ഹന്ദ്വാര പോലീസ് അറസ്റ്റ് ചെയ്തു.ലഷ്‌ക്കര്‍ ഭീകരര്‍ക്ക് പണം എത്തിക്കാനായാണ് സംഘം താഴ് വരയില്‍ മയക്കുമരുന്നു വിതരണം ചെയ്യുന്നതെന്ന് പോലീസ് അറിയിച്ചു.
പാകിസ്താന്റെ കൃത്യമായ പിന്തുണയും സംഘത്തിന് ലഭിച്ചിരുന്നു. അറസ്റ്റിനു തൊട്ടുമുന്‍പും ഇവര്‍ പാകിസ്താന് ഹാന്‍ഡ്ലര്‍മാരുമായി ബന്ധപ്പെട്ടിരുന്നു. 21 കിലോ ഹെറോയിനും 1.34 കോടി രൂപയുടെ ഇന്ത്യന്‍ കറന്‍സിയും ഇവരില്‍ നിന്ന് പിടിച്ചെടുത്തിട്ടുണ്ട്.ഹന്ദ്വാര എസ്പി ഡോ. ജി.വി സുന്ദീപ് ചക്രവര്‍ത്തി ആണ് ഇക്കാര്യങ്ങള്‍ മാദ്ധ്യമങ്ങളോട് വ്യക്തമാക്കിയത്.
അറസ്റ്റു ചെയ്ത സംഘത്തിലെ മൂന്നുപേരെയും തിരിച്ചറിഞ്ഞിട്ടുണ്ട്. കുപ്രസിദ്ധ മയക്കുമരുന്ന് കള്ളക്കടത്തുകാരനായ ഇഫ്തിഖാര്‍ ഇന്ദ്രാബിയാണ് ഇതിലെ പ്രധാനപ്രതി. ഇയാള്‍ക്കെതിരെ നിരവധി കേസുകള്‍ നേരത്തെ തന്നെ രജിസ്റ്റര്‍ ചെയ്തിട്ടുണ്ട്.രണ്ടാമന്‍ ഇഫ്തിഖാര്‍ ഇന്ദ്രാബിയുടെ മരുമകന്‍ മോമിന്‍ പിയറും മൂന്നാമന്‍ ഇക്ബാല്‍ ഉല്‍ ഇസ്ലാമുമാണ്. കൂടുതല്‍ അറസ്റ്റുകള്‍ ഇനിയും ഉണ്ടാകുമെന്നാണ് ഹന്ദ്വാര പോലീസ് നല്കുന്ന സൂചന.
ജമ്മു കശ്മീരിലെ ലഷ്‌കര്‍-ഇ-തായ്ബ ഭീകരരെ സാമ്പത്തികമായി സഹായിക്കാനായാണ് മൂന്നുപേരും മയക്കുമരുന്ന് കടത്തിയതെന്ന് മൊഴി നല്‍കിയിട്ടുണ്ട്.ഇത് വളരെ വലിയ ഹവാല റാക്കറ്റാണ്, മയക്കുമരുന്ന് കൈമാറ്റത്തിലൂടെ പണം സമ്പാദിച്ച് തീവ്രവാദ പ്രവര്‍ത്തനങ്ങള്‍ക്ക് ധനസഹായം നല്‍കുകയാണ് സംഘത്തിന്റെ ലക്ഷ്യമെന്നും എസ്പി കൂട്ടിച്ചേര്‍ത്തു.
Discussion about this post