വ്രതാനുഷ്ഠാനങ്ങള്ക്കും ചിട്ടകള്ക്കും പ്രാധാന്യമുള്ള മാസമാണ് കര്ക്കടകം. നിത്യേന നിലവിളക്ക് തെളിയിക്കുമ്പോള് വിളക്കത്ത് പുഷ്പമായി ദശപുഷ്പം വയ്ക്കുന്നത് രോഗ പ്രതിരോധത്തിന് ഏറെ സഹായിക്കും. ഇക്കാരണങ്ങള് കൊണ്ടു തന്നെ ദശപുഷ്പങ്ങള് അഷ്ടമംഗലങ്ങളില് പ്രധാനമാണ്.
കറുക, ചെറൂള, തിരുതാളി, മുയല്ച്ചെവിയന്, പൂവാന്കുരുന്നില, നിലപ്പന, വിഷ്ണുക്രാന്തി, കയ്യൂന്നി, മുക്കൂറ്റി, ഉഴിഞ്ഞ തുടങ്ങിയവയാണ് ദശപുഷ്പങ്ങള്. മഹാമാരിയായി കൊറോണ പടർന്നു പിടിക്കുന്ന ഈ പഞ്ഞക്കർക്കടകത്തിൽ ദശപുഷ്പങ്ങളുടെ ഔഷധ മൂല്യങ്ങളിലേക്ക്…
കറുക – ആദിത്യനാണു ദേവന്. കറുക ചൂടിയാല് ആധികളും വ്യാധികളും ഒഴിയും. മുലപ്പാല് വര്ധിപ്പിക്കുന്നതിനും, ഓര്മശക്തിക്കും, ബുദ്ധിശക്തിക്കും മാനസിക സമ്മര്ദം കുറയ്ക്കുന്നതിനും കറുക ഉത്തമമാണ്.
കൃഷ്ണക്രാന്തി- മഹാവിഷ്ണുവാണു ദേവന്. കൃഷ്ണക്രാന്തി ചൂടിയാല് വിഷ്ണുപ്രീതി ലഭിക്കും. തലമുടി വളരുന്നതിനും രക്തശുദ്ധിക്കും ഉത്തമ ഔഷധം.
തിരുതാളി – മഹാലക്ഷ്മിയാണു ദേവത. ദേവീപ്രസാദവും ഐശ്വര്യവും ഉണ്ടാകുന്നു. പിത്തരോഗങ്ങള്ക്കും, ഗര്ഭാശയസംബന്ധമായ രോഗങ്ങള്ക്കും ഔഷധമായി ഉപയോഗിക്കുന്നു.
പൂവാംകുരുന്നില – ബ്രഹ്മാവാണു ദേവന്. ദാരിദ്ര്യ ദുഃഖം തീരാനാണു പൂവാംകുരുന്നില ചൂടുന്നത്. ശരീരതാപം കുറയ്ക്കാനും, വെള്ളപോക്ക് ശമിക്കാനും ഉപയോഗിക്കുന്നു. രക്തശുദ്ധി വരുത്താനും മൂത്രപ്രവാഹം സുഗമമാക്കാനും ഉത്തമ ഔഷധം.
കയ്യോന്നി- ശിവനാണു ദേവന്. പഞ്ചപാപങ്ങളും തീരുമെന്നാണ് വിശ്വാസം. മുടി കൊഴിച്ചിലിനും തലവേദനയ്ക്കും ഇതിന്റെ നീര് ഉപയോഗിക്കുന്നു.
മുക്കുറ്റി – പാര്വതീദേവിയാണു ദേവത. ഭക്തിയോടെ മുക്കുറ്റി ചൂടിയാല് ഭര്തൃസൗഖ്യവും പുത്രഭാഗ്യവും ലഭിക്കും. അമിത രക്തസ്രാവത്തിനും അര്ശസ്സിനും മുറിവുകള് ഉണങ്ങുന്നതിനും ഉപയോഗിക്കുന്നു. പ്രസവശേഷം മുക്കുറ്റി ഇടിച്ചുപിഴിഞ്ഞ നീര് കഴിക്കുന്നത് നല്ലതാണെന്ന് പറയപ്പെടുന്നു.
നിലപ്പന- ഭൂമിദേവിയാണു ദേവത. പാപങ്ങള് അകന്നുപോകും. ആര്ത്തവ സംബന്ധമായ രോഗങ്ങള്, അമിത രക്തസ്രാവം, യോനീരോഗം, മൂത്രച്ചുടിച്ചില് എന്നിവയ്ക്ക് കൺകണ്ട ഔഷധമാണ് നിലപ്പന.
ഉഴിഞ്ഞ – ഇന്ദ്രാണിയാണു ദേവത. അഭീഷ്ടസിദ്ധിയാണ് ഉഴിഞ്ഞ ചൂടിയാല് ഫലം. മുടികൊഴിച്ചില്, വാതം, നീര് എന്നിവ പരിഹരിക്കാനും, സുഖപ്രസവത്തിനും ഉഴിഞ്ഞ ഉത്തമമാണ്.
ചെറൂള – യമനാണ് ദേവൻ. ആയുസ്സു വര്ധിക്കുമെന്നാണു വിശ്വാസം. രക്തസ്രാവം, കൃമിശല്യം, മൂത്രക്കല്ല് എന്നീ രോഗങ്ങൾക്ക് ഔഷധമായി ഉപയോഗിക്കുന്നു.
പാരമ്പര്യ വൈദ്യത്തിന്റെയും നാട്ടറിവുകളുടെയും ഔഷധ ശേഖരത്തിൽ അതുല്യ സിദ്ധികളുള്ള പച്ചമരുന്നുകളുടെ വിശേഷങ്ങൾ അനവധിയാണ്. ഔഷധ സേവയുടെയും ഈശ്വര ചിന്തയുടെയും മാസമായ കർക്കടകം ശരീര ശുദ്ധിക്കും മനഃശുദ്ധിക്കും ഒരേ പോലെ പ്രധാനപ്പെട്ട മാസമാണ്. മനസ്സും ശരീരവും പ്രകൃതിയെ ഏൽപ്പിച്ച് സർവ്വ പ്രപഞ്ചത്തിന്റെയും നാധനിലേക്ക് വിശ്രാന്തിയിൽ നടത്തുന്ന തീർത്ഥയാത്രകളാണ് ഓരോ കർക്കടക മാസങ്ങളും. രോഗപ്രതിരോധം തന്നെയാണ് ഏറ്റവും വലിയ ചികിത്സയെന്ന ഭാരതീയ ഭിഷഗ്വര ചിന്തയിലേക്ക് ലോകം ഉറ്റുനോക്കുന്ന ഈ കർക്കടകത്തിനപ്പുറം സ്വച്ഛതയുടെ ചിങ്ങപ്പുലരിയിലേക്ക് കാൽ വെക്കാനുള്ള പ്രാർത്ഥനകളാണ് ഓരോ ചികിത്സാലയങ്ങളിലും മുഴങ്ങുന്നത്.
