അട്ടപ്പാടി : അട്ടപ്പാടിയിലെ ഭവാനിപ്പുഴയിലുണ്ടായ മലവെള്ളപ്പാച്ചിലിനെ തുടർന്ന് പോലീസ് സംഘം വനത്തിൽ കുടുങ്ങി. വനത്തിൽ തിരച്ചിലിനു പോയ നക്സൽ വിരുദ്ധ സേനയിലെ അഞ്ചുപേരും തണ്ടർബോൾട്ട് കമാൻഡോ സംഘത്തിലെ ചിലരും ഒരു എസ്ഐയുമാണ് സംഘത്തിലുള്ളത്. കനത്ത മഴയെ തുടർന്ന് അപ്രതീക്ഷിതമായി പുഴയിൽ ജലനിരപ്പ് ഉയരുകയായിരുന്നു.
ബംഗാൾ ഉൾക്കടലിൽ ന്യൂനമർദ്ദം രൂപപ്പെടുന്നതിനാൽ കേരളത്തിലെ പലസ്ഥലത്തും അതിതീവ്രമായ മഴയ്ക്ക് സാധ്യതയുണ്ട്.കണ്ണൂർ, മലപ്പുറം, കാസർകോട്, ഇടുക്കി ജില്ലകളിൽ കാലാവസ്ഥാ വകുപ്പ് റെഡ് അലർട്ട് പ്രഖ്യാപിച്ചിട്ടുണ്ട്. ഇവിടങ്ങളിൽ 204.5 മില്ലിമീറ്റർ അധികം മഴ ലഭിക്കുമെന്നും മുന്നറിയിപ്പുണ്ട്. ഉരുൾപൊട്ടൽ മണ്ണിടിച്ചിൽ സാധ്യതയുള്ള പ്രദേശങ്ങളിൽ താമസിക്കുന്നവർ മുൻകരുതലെടുക്കണം. മലയോര പ്രദേശങ്ങളിൽ വൈകുന്നേരം ഏഴ് മുതൽ രാവിലെ ഏഴ് വരെ ഗതാഗതം നിരോധിക്കുമെന്നും മത്സ്യത്തൊഴിലാളികൾ കടലിൽ പോകരുതെന്നും സർക്കാർ മുന്നറിയിപ്പു നൽകി.
