ന്യൂഡൽഹി : യൂട്യൂബർ ഗൗരവ് വാസനെതിരെ പരാതിയുമായി ഡൽഹിയിലെ ‘ബാബ കാ ധാബ’ ഭക്ഷണശാലയുടെ ഉടമ കാന്ത പ്രസാദ്. കോവിഡ് വ്യാപനത്തെ തുടർന്ന് ഡൽഹിയിലെ മാളവ്യ നഗറിൽ ഭക്ഷണശാല നടത്തിയിരുന്ന കാന്തപ്രസാദിന്റെയും ഭാര്യയുടെയും വരുമാനം നിലച്ചുവെന്നും അതിനാൽ ജീവിതം വഴിമുട്ടിയെന്നുമുള്ള ദുരിതകഥ സാമൂഹ്യ മാധ്യമങ്ങളിലൂടെ ലോകത്തെയറിയിച്ചത് യൂട്യൂബർ ഗൗരവ് വാസനായിരുന്നു.
തങ്ങൾക്കുള്ള സംഭാവനയെന്ന പേരിൽ ഓൺലൈനിലൂടെ ഫണ്ട് സമാഹരിച്ച് ഇയാൾ തട്ടിപ്പ് നടത്തിയെന്ന് ആരോപിച്ചാണ് വൃദ്ധ ദമ്പതികൾ ഇപ്പോൾ രംഗത്തുവന്നിട്ടുള്ളത്. ലോക്ക്ഡൗൺ സമയത്ത് ജീവിതമാർഗം നിലച്ചതിനാൽ പൊട്ടികരയുന്ന 80 വയസുകാരനായ കാന്തപ്രസാദിന്റെ വീഡിയോ സാമൂഹ്യ മാധ്യമങ്ങളിലെല്ലാം വൈറലായിരുന്നു. ബോളിവുഡ് താരങ്ങളുൾപ്പെടെ വീഡിയോ പങ്കുവെയ്ക്കുകയും ചെയ്തിരുന്നു. സാമൂഹ്യമാധ്യമങ്ങളിൽ വീഡിയോയ്‌ക്കൊപ്പം ഗൗരവ് വാസൻ സ്വന്തം ബാങ്ക് അക്കൗണ്ട് നമ്പറും ബന്ധുക്കളുടെ അക്കൗണ്ട് നമ്പറും നൽകിയിരുന്നു.
ഇങ്ങനെ ലഭിച്ച പണം കൈക്കലാക്കിയെന്ന് ആരോപിച്ചാണ് കാന്തപ്രസാദ് പരാതി നൽകിയിരിക്കുന്നത്. സംഭവത്തെ കുറിച്ചുള്ള അന്വേഷണം നടന്നുവരികയാണെന്ന് മാളവ്യ നഗർ പോലീസ് അറിയിച്ചു.
Discussion about this post