തിരുവനന്തപുരം: അന്താരാഷ്ട്ര വിമാനത്താവളത്തിന്റെ നടത്തിപ്പ് ചുമതല അദാനിക്ക് വിട്ട കേന്ദ്രസർക്കാർ നീക്കത്തിനെതിരെ സുപ്രീം കോടതിയെ സമീപിക്കാനുള്ള തീരുമാനത്തിൽ നിന്നും പിൻമാറി സംസ്ഥാന സർക്കാർ.
അനുകൂല വിധിയ്ക്കു സാധ്യതയില്ലെന്ന് നിയമോപദേശം ലഭിച്ച സാഹചര്യത്തിലാണ് സുപ്രീം കോടതിയിൽ അപ്പീൽ നൽകാനുള്ള തീരുമാനത്തിൽ നിന്നും സർക്കാർ പിന്മാറിയിട്ടുള്ളത്. അതേസമയം, സുപ്രീംകോടതിയെ സമീപിക്കാൻ എയർപോർട്ട് എംപ്ലോയിസ് യൂണിയൻ തീരുമാനിച്ചിട്ടുണ്ട്. സംസ്ഥാന സർക്കാർ, തിരുവനന്തപുരം വിമാനത്താവളം അദാനിക്ക് കൈമാറുന്നതിനെതിരെ ഹൈക്കോടതിയിൽ നൽകിയ ഹർജി തള്ളിയിട്ട് ഏകദേശം ഒരു മാസമായി.
അദാനി ഗ്രൂപ്പിനെ കേന്ദ്രം സഹായിക്കുകയാണെന്നതടക്കമുള്ള വാദങ്ങളൊന്നും ഹൈക്കോടതി അംഗീകരിച്ചിരുന്നില്ല. അന്ന്, ടെൻഡർ നടപടിയിൽ പങ്കെടുത്തശേഷം ഇതിനെ ചോദ്യം ചെയ്യുന്നതിലെ സാധുതയാണ്‌ കോടതി വിമർശിച്ചത്. ഇതു തന്നെയായിരിക്കും സുപ്രീംകോടതിയിൽ പോയാലുള്ള അവസ്ഥയെന്നാണ് സംസ്ഥാന സർക്കാരിനു ലഭിച്ച നിയമോപദേശം.
Discussion about this post