ഡൽഹി: പൊലീസ് നിയമ ഭേദഗതിയുടെ പേരിൽ സിപിഎമ്മിൽ ചേരിതിരിവ്. കേരള സർക്കാർ പാസാക്കിയ ഓർഡിനൻസിനെതിരെ കടുത്ത എതിർപ്പുമായി സിപിഎം കേന്ദ്ര നേതൃത്വം രംഗത്തെത്തി. ഭേദഗതിയിൽ തിരുത്തൽ വരുത്താൻ സംസ്ഥാന ഘടകത്തിന് പൊളിറ്റ് ബ്യൂറോ നിര്‍ദ്ദേശം നൽകുമെന്നാണ് സൂചന.
വിഷയത്തിൽ പാർട്ടി കേന്ദ്ര നേതൃത്വം സംസ്ഥാന നേതാക്കളെ ബന്ധപ്പെട്ടതായാണ് സൂചന. സംസ്ഥാന നേതൃത്വം കർശനമായി നടപ്പിലാക്കാൻ ഉദ്ദേശിച്ച് കൊണ്ടു വന്നിരിക്കുന്ന നിയമത്തിൽ കേന്ദ്ര നേതൃത്വം ഭിന്ന നിലപാട് സ്വീകരിക്കുന്നത് നേതാക്കൾക്കിടയിൽ അസ്വാരസ്യത്തിന് കാരണമായേക്കും.
അതേസമയം മാധ്യമങ്ങളെ നിയന്ത്രിക്കാൻ സംസ്ഥാന സർക്കാർ കൊണ്ടു വന്ന നിയമത്തിനെതിരെ പതിയെ ആണെങ്കിലും പ്രതിഷേധം കനക്കുകയാണ്. നിയമത്തെ എതിർത്ത് ബിജെപി ആദ്യമേ രംഗത്ത് വന്നിരുന്നു. കോൺഗ്രസ് ദേശീയ- സംസ്ഥാന നേതാക്കൾ ഒരേ പോലെ നിയമ ഭേദഗതിക്കെതിരെ രംഗത്ത് വന്നിട്ടുണ്ട്. സിപിഐ നേതാവ് ബിനോയ് വിശ്വം നിയമത്തിനെതിരെ നിലപാട് സ്വീകരിച്ചു. ചില ഇടത് ചിന്തകരും നിയമത്തിനെതിരെ രംഗത്ത് വന്നിട്ടുണ്ട്.
