ആദിമ മനുഷ്യന്‍ ആഹാരം കണ്ടെത്തിത്തുടങ്ങിയ കാലം മുതല്‍ തന്നെ മത്സ്യം പ്രധാന മാംസ്യാഹാരമായതാണ്. സ്വാഭാവികമായും ജലാശയങ്ങള്‍ക്കും നദികള്‍ക്കും സമീപം വസിച്ചിരുന്നവരാണ് ദൈനം ദിന ജീവിതത്തില്‍ മത്സ്യം പ്രധാന ഭക്ഷണമാക്കിയത്. കേരളീയര്‍ നെല്ലരിയും മരച്ചീനിയും പോലെ ഇഷ്ടപ്പെടുന്ന മാംസാഹാരമാണ് മത്സ്യം. മാംസാഹാരങ്ങള്‍ പൊതുവേ വര്‍ജ്ജിക്കുക എന്നാണു ലോകമെമ്പാടുമുള്ള പോഷകാഹാര ശാസ്ത്രജ്ഞന്മാരുടെ അഭിപ്രായം. എന്നാല്‍ മറ്റു മാംസാഹാരങ്ങളില്‍ നിന്ന് മനുഷ്യന്റെ ആരോഗ്യം സംരക്ഷിക്കുന്നതില്‍ മത്സ്യം വേറിട്ട് നില്‍ക്കുന്നു.
മത്സ്യം ഒന്നാന്തരം മാംസ്യത്തിന്റെ ഉറവിടമാണ്. ആഹാരത്തിലൂടെ എത്ര ഊര്‍ജ്ജം ലഭിച്ചാലും തക്കതായ അളവില്‍ മാംസ്യം ലഭിച്ചില്ലെങ്കില്‍ തൃപ്തികരമായ വളര്‍ച്ചയും ആരോഗ്യകരമായ നിലനില്‍പ്പും അസാധ്യമാകും. പാല്‍, മുട്ട കരള്‍ എന്നിവയിലെ മാംസ്യത്തെക്കാള്‍ തൊട്ടു താഴെയാണ് മത്സ്യ മാംസത്തിന്റെ പോഷണ നിലവാരം. പക്ഷെ, എല്ലാ സസ്യ മാംസ്യങ്ങളെക്കാള്‍ ഉയര്‍ന്ന ഗുണനിലവാരമാണ് മത്സ്യമാംസ്യത്തിന് എന്നും അറിയുക. ഒരു കാലത്ത് കേരളത്തിന്റെ തീന്‍മേശയിലെ നിത്യസന്ദര്‍ശകരായിരുന്നു പാകം ചെയ്ത മരച്ചീനിയും കൂട്ടിനു മീന്‍കറിയും.
മത്സ്യക്കൊഴുപ്പുകള്‍ക്ക് നമ്മുടെ രക്തത്തിലെ ട്രൈഗ്ലിസറൈഡ് എന്ന ഘടകം കുറയ്ക്കും എന്ന കഴിവുകൂടിയുണ്ട്. കൊളസ്‌ട്രോള്‍ കഴിഞ്ഞാല്‍ രക്തഘടകങ്ങള്‍ ഹൃദ്രോഗ ബാധയില്‍ ആകുന്നത് ഉയര്‍ന്ന ട്രൈഗ്ലിസറൈഡ് കാരണമാണ്. ആഴ്ചയില്‍ ഒരാള്‍ക്ക് അഞ്ചു ദിവസ മെങ്കിലും 30 gm- 40 gm മത്സ്യം കഴിച്ചാല്‍ ഇത് ഒഴിവാക്കാന്‍ കഴിയും എന്നത് പഠനങ്ങള്‍ തെളിയിച്ചിട്ടുണ്ട്. അയല, ആവോലി, മത്തി, ചൂര എന്നീ സാധാരണ മത്സ്യങ്ങളിലെല്ലാം തന്നെ രണ്ടു മുതല്‍ നാല് ശതമാനത്തിന്റെ ഉള്ളിലാണ് കൊഴുപ്പ്. നെയ്മത്തിയിലും കൊഴുപ്പ് ധാരാളമുണ്ട്. നെയ്മീനിലും കൊഴുപ്പ് ഏതാണ്ട് നാല് ശതമാനം വരെ വരും.
മത്സ്യ കൊഴുപ്പില്‍ അടങ്ങിയിട്ടുള്ള ഒമേഗ 3 ഫാറ്റി ആസിഡുകളാണ് ഹൃദയത്തിന്റെ ആരോഗ്യം കാത്തു സൂക്ഷിക്കുന്നതില്‍ വലിയ പങ്കു വഹിക്കുന്നത്. ഡോക്കോസ, ഹെക്‌സ, ഇനോയിക്ക് ആസിഡ്, എക്കോസ, പെന്റാ ഇനോയിക്ക് ആസിഡ് എന്നീ അഞ്ചും ആറും
അപൂരിത ബോണ്ടുകളുള്ള ഫാറ്റി അമ്ലങ്ങളാണ് മത്സ്യം ഹൃദയത്തിന് നല്ലതാണ് എന്നതിന് കാരണം. DHA, EPA എന്ന ഇവ ഹൃദയാഘാതം ഉണ്ടാകാതെ സൂക്ഷിക്കാനും ഹൃദയാഘാതം ഉണ്ടാകുകയാണെങ്കില്‍ രക്തം കട്ടയാകാതിരിക്കാനും സഹായിക്കുന്നു.
സോയാബീന്‍ എണ്ണ, കോണ്‍ ഓയില്‍, സണ്‍ ഫ്ലവര്‍ ഓയില്‍ തുടങ്ങിയവയില്‍ അടങ്ങിയിരിക്കുന്നത് ഒമേഗ 6 കുടുംബത്തിലെ അത്യപൂരിത ഫാറ്റി അമ്ലങ്ങളാണ്. അവയുടെ ഉപയോഗം കൊളസ്‌ട്രോള്‍ കുറയ്ക്കും എന്നതു സത്യമാണ്. പക്ഷെ, അതിനുപരിയായി ഹൃദയത്തിന് നേരിട്ട് സംരക്ഷണം നല്‍കുന്നതില്‍ മത്സ്യക്കൊഴുപ്പുകള്‍ക്ക് സമാനമായ കഴിവ് ഇവയ്ക്കില്ല എന്ന് നാമറിയണം. സോയാബീന്‍ എണ്ണയിലും കടുകെണ്ണയിലും കുറച്ച് ഒമേഗ 3 എണ്ണകള്‍ ഉണ്ടെങ്കിലും അവയൊന്നും തന്നെ ഹൃദയ പരിരക്ഷണത്തില്‍ മത്സ്യത്തിന് സമമാകില്ല എന്നത് മനസ്സിലാക്കണം.
ഗോയിറ്റര്‍, തൈറോയിഡ് തുടങ്ങിയവ മാറുന്നതിനാവശ്യമായ അയഡിന്‍ നമുക്ക് ധാരാളം ലഭിക്കും. നത്തോലി (ചൂട) പോലെയുള്ള ചെറുമത്സ്യങ്ങള്‍ കാത്സ്യത്തിന്റെ ഉറവിടമാണ്.
പ്രമേഹമുള്ളവര്‍ക്കും കൊഴുപ്പുള്ളവര്‍ക്കുമെല്ലാം നിര്‍ലോഭം കഴിക്കാവുന്ന ഭക്ഷണമാണ് മത്സ്യം. മത്സ്യം അധികം മസാലയില്ലാതെയും രുചികരമായി കഴിക്കാം എന്നുള്ളത് കൊണ്ട് അസിഡിറ്റി പോലെയുള്ള അസുഖങ്ങള്‍ വരുമെന്ന പേടിയും വേണ്ട.
Discussion about this post