കോട്ടയം: സിപിഎമ്മിനെതിരെ നിലപാട് കടുപ്പിച്ച് വീണ്ടും എൻ എസ് എസ്. സിപിഎം സംസ്ഥാന സെക്രട്ടറി എ വിജയരാഘവന്റെ ലേഖനം മറുപടി അർഹിക്കാത്തതാണെന്ന് എൻ എസ് എസ് ജനറൽ സെക്രട്ടറി ജി സുകുമാരൻ നായർ പറഞ്ഞു. തെരഞ്ഞെടുപ്പ് ദിവസം പറഞ്ഞതിൽ രാഷ്ട്രീയമോ മതപരമോ ആയ ഒന്നുമില്ലെന്നും അദ്ദേഹം വ്യക്തമാക്കി.
വിഷയത്തിന് മതസാമുദായിക പരിവേഷം നൽകിയത് മുഖ്യമന്ത്രിയാണ്. പൊള്ളത്തരം ജനങ്ങളെ അറിയിക്കാനുള്ള ബാധ്യത ഉള്ളതുകൊണ്ടാണ് പ്രതികരിക്കുന്നതെന്നും സുകുമാരൻ നായർ വ്യക്തമാക്കി. മാധ്യമങ്ങളുടെ ചോദ്യത്തിന് മറുപടിയായാണ് വിശ്വാസികളുമായി ബന്ധപ്പെട്ട വിഷയത്തിൽ തന്റെ പ്രതികരണം. അല്ലാതെ പ്രസ്താവന നടത്തുകയായിരുന്നില്ല. എന്നാൽ തെരഞ്ഞെടുപ്പ് ദിവസം അയ്യപ്പനും ദേവഗണങ്ങളും തങ്ങൾക്കൊപ്പമാണെന്ന പ്രസ്താവന മുഖ്യമന്ത്രിയുടേതായിരുന്നുവെന്നും സുകുമാരൻ നായർ പറഞ്ഞു.
എൻ എസ് എസിനെ സിപിഎം വളഞ്ഞ വഴിയിൽ ഉപദേശിക്കേണ്ട. ആർ എസ് എസ് അടക്കമുള്ള എല്ലാ സംഘടനകളുമായും ഒരേ വിധത്തിലുള്ള സൗഹൃദമാണ് തങ്ങൾക്കുള്ളതെന്നും സുകുമാരൻ നായർ വ്യക്തമാക്കി.
Discussion about this post