കടത്തീരങ്ങളും കടലിന്റെ അവർണ്ണനീയമായ സൗന്ദര്യവും ആസ്വദിക്കാൻ ഇഷ്ടപ്പെടുന്നവരാണ് നമ്മൾ. അതുകൊണ്ട് തന്നെയാണ് എത്ര കണ്ടാലും മതിവരാത്ത കടൽ തീരങ്ങളാൽ സമ്പന്നമായ ഗോവ സഞ്ചാരികളുടെ പ്രിയപ്പെട്ട ഇടമാക്കുന്നതും. സഞ്ചാരികളെ ഇത്രയും മനോഹരമായി വരവേൽക്കുന്ന മറ്റൊരു ഇടം ഉണ്ടോയെന്ന് തന്നെ ഒരുവേള തോന്നിപോകും ഇവിടെ എത്തുന്നവർക്ക്. ബീച്ചുകളും അവിടുത്തെ രാത്രി ജീവിതവും പാര്‍ട്ടികളും ഷാക്കിലെ താമസവും തുടങ്ങി ഗോവയിലെ ആകര്‍ഷണങ്ങള്‍ ഏറെയാണ്. എന്നാല്‍ ഇന്നും സഞ്ചാരികള്‍ക്ക് പരിചിതമല്ലാത്ത ഒരുപാട് ഇടങ്ങളും ഗോവയിലുണ്ട്. അത്തരത്തിലൊന്നാണ് ഇരുട്ടില്‍ തിളങ്ങുന്ന ബീച്ച്.
തെളിഞ്ഞ വെള്ളത്തില്‍ സ്വര്‍ണ്ണ മണല്‍ത്തരികളുമായി കിടക്കുന്ന ബീറ്റല്‍ബാറ്റിം ബീച്ചാണ് രാത്രിയിൽ തിളങ്ങുന്നത്. മനോഹരമായ സൂര്യാസ്തമയ കാഴ്ചകളാണ് ഇവിടുത്തെ മറ്റൊരു പ്രത്യേകത. ചക്രവാളത്തിലേക്ക് സൂര്യനിറങ്ങി മറയുന്ന കാഴ്ച ആസ്വദിച്ചു നില്‍ക്കുവാന്‍ ഗോവയില്‍ ഇതിലും മനോഹരമായ ബീച്ചില്ല. അതുകൊണ്ട് തന്നെ ഗോവയിലെ സണ്‍സെറ്റ് ബീച്ച് എന്നാണ് ബീറ്റില്‍ബാറ്റിം ബീച്ചിനെ സഞ്ചാരികള്‍ വിളിക്കുന്നത്. ബയോലൂമിനിയെസെന്റ് ആല്‍ഗകള്‍ വെള്ളത്തിലുള്ളതുകൊണ്ടാണ് ഈ ബീച്ചിലെ ജലത്തിന് തിളക്കം വരുന്നതെന്നാണ് കണ്ടെത്തൽ. വളരെ കുറച്ച് സമയം മാത്രമേ സഞ്ചാരികള്‍ക്ക് ഈ തിളക്കം കാണാൻ സാധിക്കുള്ളൂ.
രാത്രിയില്‍ നീല നിറത്തില്‍ തിളങ്ങുന്ന ഈ ബീച്ച് കാണാനായി നിരവധി പേർ എത്തുന്നുണ്ട്. ബീച്ചിന് തൊട്ടടുത്തുള്ള വെള്ളത്തിൽ ബയോലുമിനെസെന്റ് ഫൈറ്റോപ്ലാങ്ക്ടണുകൾ ഉണ്ട്. ജലത്തിന്റെ വേലിയേറ്റത്തിൽ വസിക്കുന്ന ജീവികളാണിത്. വേലിയേറ്റം കരയിൽ എത്തുമ്പോൾ അവയുടെ ഒഴുക്ക് അസ്വസ്ഥമാവുകയും പ്രകാശം പുറപ്പെടുവിക്കുന്ന പിഗ്മെന്റ് വഴി നീലനിറം പുറപ്പെടുവിക്കുകയും ചെയ്യുന്നുവെന്നാണ് ശാസ്ത്ര വിശദീകരണം.ഗോവയിലെ മറ്റു ബീച്ചുകളിൽ നിന്നും വ്യത്യസ്തമായി വളരെ ശാന്തസുന്ദരവും വൃത്തിയുടെ കാര്യത്തിൽ മുന്നിൽ നിൽക്കുന്നതുമാണ് ഈ ബീച്ച്.
പൈൻ മരങ്ങൾ നിറഞ്ഞ ബീറ്റൽബാറ്റിം ബീച്ച് കാഴ്ചയിൽ മനോഹരിയാണ്. നിരവധി ഡോള്‍ഫിനുകളെയും ഈ ബീച്ചില്‍ കാണാനാകും.നിരവധി പക്ഷികളുടെയും ആവാസകേന്ദ്രമാണിവിടം. ഗോവ വിമാനത്താവളത്തില്‍ നിന്നും 22 കിലോമീറ്റര്‍ അകലെയാണ് ബീറ്റല്‍ബാറ്റിം ബീച്ച് സ്ഥിതി ചെയ്യുന്നത്.
ബീറ്റല്‍ബാറ്റിം ബീച്ചിന്റെ സൗന്ദര്യത്തിനൊപ്പം പാരാസൈലിങ് പോലുള്ള നിരവധി സ്പോർട്സ് വിനോദങ്ങളും ഇവിടെ ഒരുക്കിയിട്ടുണ്ട്. നവംബര്‍ മുതല്‍ ഫെബ്രുവരി വരെയുള്ള മാസങ്ങളിലാണ് ഇവിടേക്ക് സഞ്ചാരികള്‍ കൂടുതലായി എത്താറുള്ളത്.
ഏതു കാലാവസ്ഥയാണെങ്കിലും സന്തോഷിക്കുവാനും അടിച്ചുപൊളിക്കുവാനും വേണ്ടതെല്ലാം ഇവിടെയുണ്ട്. തിരക്ക് പിടിച്ച ജീവിത സാഹചര്യങ്ങളിൽ അല്പം ആശ്വാസവും സന്തോഷവും ആഗ്രഹിച്ചാണ് നമ്മൾ വിനോദ യാത്രകൾ നടത്താറുള്ളത്. അങ്ങനെ ആഗ്രഹിക്കുന്നവർക്ക് പോകാൻ പറ്റിയ ഇടമാണിത്. അതി മനോഹരമായ കാഴ്ചകൾ ഒരുക്കി സ്വയം അലങ്കരിച്ച് നിങ്ങളെ കാത്തിരിക്കുകയാണ് ഈ നിശാസുന്ദരി….
https://www.youtube.com/watch?v=LfH5OwFQ7A8
Discussion about this post