കാബൂള്‍ : പെണ്‍കുട്ടികള്‍ക്ക് വിദ്യാഭ്യാസം വിലക്കില്ലെന്ന വാഗ്‌ദാനം പാലിച്ച് താലിബാന്‍ തയ്യാറാക്കിയിരിക്കുന്നത് വിചിത്രമായ ക്ലാസ് മുറിയാണ്. ആണ്‍കുട്ടികളെയും പെണ്‍കുട്ടികളെയും രണ്ടാക്കി തിരിച്ചു കൊണ്ട് ക്ലാസ് മുറിയുടെ നെടുകേ കട്ടി തുണി കൊണ്ടുള്ള മറ തീര്‍ത്തിരിക്കുകയാണ്.
അഫ്ഗാനിലെ സര്‍വകലാശാലയിലെ ക്ലാസ് മുറിയുടെ ചിത്രം ടോളോ ന്യൂസിലെ മാദ്ധ്യമപ്രവര്‍ത്തകന്‍ തമിം ഹാമിദാണ് ട്വീറ്റ് ചെയ്തിരിക്കുന്നത്. പുറത്ത് വന്ന ചിത്രത്തില്‍ കര്‍ട്ടന്റെ ഒരു വശത്ത് ആണ്‍കുട്ടികളെയും മറുവശത്ത് പെണ്‍കുട്ടികളെയും കാണാം
കഴിഞ്ഞ ദിവസമാണ് താലിബാന്‍ കോളേജില്‍ പഠിക്കുന്ന വിദ്യാര്‍ത്ഥിനികള്‍ക്കായി പ്രത്യേക നിയമങ്ങള്‍ പുറത്തിറക്കിയത്. ഇത് പ്രകാരം പെണ്‍കുട്ടികള്‍ പുറത്തിറങ്ങുമ്പോള്‍ നിഖാബ് നിര്‍ബന്ധമായും ധരിക്കണം. സര്‍വകലാശാലയില്‍ പഠിക്കുന്ന എല്ലാ സ്ത്രീകളും നിര്‍ബന്ധമായും അബായ വസ്ത്രവും നിഖാബും ധരിക്കണമെന്ന് പുറത്തിറക്കിയ പട്ടികയില്‍ പറയുന്നു. സ്ത്രീകള്‍ അവരുടെ മുഖം ഭൂരിഭാഗവും മറയ്‌ക്കേണ്ടതാണ്. കഴിഞ്ഞ കുറേ വര്‍ഷമായി അഫ്ഗാന്‍ പട്ടണങ്ങളില്‍ നിന്നും ബുര്‍ഖകളും നിഖാബുകളും അപ്രത്യക്ഷമായി കൊണ്ടിരുന്ന വസ്ത്രമാണ്.
വസ്ത്രധാരണത്തിന് പുറമേ സ്‌കൂളുകളിലും കോളേജുകളിലേയും പാഠ്യരീതികളിലും താലിബാന്‍ നിയന്ത്രണം കൊണ്ടു വരുന്നുണ്ട്. പെണ്‍കുട്ടികളെ വനിത അദ്ധ്യാപകര്‍ മാത്രമേ ക്ലാസെടുക്കാന്‍ അനുവദിക്കുകയുള്ളു. ഇനി അദ്ധ്യാപികമാരെ ലഭിക്കാതെ വന്നാല്‍ നല്ല സ്വഭാവമുള്ള വൃദ്ധരായ അദ്ധ്യാപകരെ നിയമിക്കാന്‍ അനുമതിയുണ്ട്. സ്‌കൂളുകളിലും കോളേജുകളിലും വരുമ്പോഴും ഇടവേളകളിലും പെണ്‍കുട്ടികള്‍ ആണ്‍കുട്ടികളുമായി പരസ്പരം ഇടപഴകുന്നതിനും വിലക്കുണ്ട്.
