കാബൂള്: പ്രതിരോധസേന ശക്തമായ ചെറുത്തുനില്പ്പ് നടത്തിയ പഞ്ച്ശീര് താഴ്വരകൂടി പിടിച്ചെടുത്തതിന് പിന്നാലെ അഫ്ഗാനിസ്താനില് സര്ക്കാര് രൂപവത്കരിക്കുന്നതിനുള്ള നീക്കങ്ങള് അവസാന ഘട്ടത്തിലാണെന്ന് അവകാശവാദവുമായി താലിബാന്. പുതിയ സര്ക്കാര് അധികാരമേല്ക്കുന്ന ചടങ്ങിലേക്ക് പാകിസ്താനും ചൈനയും അടക്കമുള്ള രാജ്യങ്ങളെ താലിബാന് ക്ഷണിച്ചുവെന്ന വിവരവും പുറത്തുവന്നിട്ടുണ്ട്. പാകിസ്താന്, ചൈന, റഷ്യ, തുര്ക്കി, ഖത്തര്, ഇറാന് എന്നീ രാജ്യങ്ങളെ താലിബാന് ക്ഷണിച്ചിട്ടുണ്ടെന്നാണ് വിവരം.
സംഘര്ഷം അവസാനിച്ചുവെന്നും രാജ്യത്ത് സുസ്ഥിര സര്ക്കാര് രൂപവത്കരിക്കാന് കഴിയുമെന്നാണ് പ്രതീക്ഷയെന്നും താലിബാന് വക്താവ് സബീബുള്ള മുജാഹിദ് കാബൂളില് നടത്തിയ വാര്ത്താ സമ്മേളനത്തില് പറഞ്ഞു. ”ഇനി ആയുധം എടുക്കുന്നവര് രാജ്യത്തിന്റെ ശത്രുക്കളാണ്. ഇനിയും പ്രശ്നങ്ങള് ഉണ്ടാക്കാന് ശ്രമിക്കുന്നവരെ പഞ്ച്ശീറിലേതിന് സമാനമായ രീതിയില് നേരിടും. അധിനിവേശക്കാര് രാജ്യത്ത് വികസന പ്രവര്ത്തനങ്ങള് നടത്തില്ലെന്ന് ജനങ്ങള് ഇനിയെങ്കിലും മനസിലാക്കണം. അതിന്റെ ഉത്തരവാദിത്വം നമ്മള് തന്നെ ഏറ്റെടുക്കണം. കാബൂള് വിമാനത്താവളത്തിന്റെ പ്രവര്ത്തനം പുനരാരംഭിക്കാനുള്ള ശ്രമങ്ങള് പുരോഗമിക്കുകയാണ്. ഖത്തര്, തുര്ക്കി, യു.എ.ഇ എന്നീ രാജ്യങ്ങളില്നിന്നുള്ള വിദഗ്ധര് വിമാനത്താവളത്തിന്റെ പ്രവര്ത്തനം സാധാരണ നിലയിലാക്കാനുള്ള ശ്രമം നടത്തുകയാണ്”. താലിബാന് വക്താവ് പറഞ്ഞു. താലിബാനെതിരെ പ്രതിരോധം തീര്ത്ത പഞ്ചശീര് പിടിച്ചെടുത്തുവെന്ന അവകാശവാദം വക്താവ് ആവര്ത്തിച്ചു.
തലസ്ഥാനമായ കാബൂളിന്റെ നിയന്ത്രണം കഴിഞ്ഞമാസം താലിബാന് ഏറ്റെടുത്തിരുന്നുവെങ്കിലും പ്രതിരോധസേന പഞ്ച്ശീറില് ശക്തമായ ചെറുത്തുനില്പ്പ് നടത്തുകയായിരുന്നു. എന്നാല് ആയിരക്കണക്കിന് താലിബാന് തീവ്രവാദികള് കഴിഞ്ഞ ദിവസം രാത്രിയോടെ പഞ്ച്ശീറില് പ്രവേശിച്ചുവെന്ന് അന്താരാഷ്ട്ര മാധ്യമങ്ങള് റിപ്പോര്ട്ടു ചെയ്തു. പഞ്ച്ശീര് തങ്ങളുടെ നിയന്ത്രണത്തിലായെന്ന താലിബാന്റെ അവകാശവാദം പിന്നീട് വന്നു. എന്നാല്, പഞ്ച്ശീറില് പോരാട്ടം തുടരുമെന്നാണ് പ്രതിരോധ സേന അവകാശപ്പെടുന്നത്. പ്രതിരോധ സേനയുടെ വക്താവ് ഏറ്റുമുട്ടലിനിടെ കൊല്ലപ്പെട്ടത് അവര്ക്ക് കനത്ത തിരിച്ചടി സൃഷ്ടിച്ചിട്ടുണ്ട്.
Discussion about this post