തിരുവനന്തപുരം: കെ പി സി സി വർക്കിംഗ് പ്രസിഡന്റ് പി ടി തോമസ് എം എൽ എ അന്തരിച്ചു. തൃക്കാക്കര എം എൽ എ ആയിരുന്നു. മിഴ്നാട്ടിലെ വെല്ലൂർ ആശുപത്രിയിൽ വച്ച് രാവിലെ 10.10-ഓടെയായിരുന്നു അന്ത്യം.
അർബുദരോഗബാധിതനായി ദീർഘകാലമായി ചികിത്സയിലായിരുന്നു. ചികിത്സയുടെ ഭാഗമായി വെല്ലൂരിൽ തുടരുന്നതിനിടെയായിരുന്നു അന്ത്യം. ആരോഗ്യപരമായ ചില പ്രശ്നങ്ങളാൽ അദ്ദേഹത്തിന് കീമോതെറാപ്പി നടത്താൻ ചില ബുദ്ധിമുട്ടുകളുണ്ടായിരുന്നു.
അമേരിക്കയിൽ നിന്നടക്കമുള്ള ഡോക്ടർമാരുടെ മേൽനോട്ടത്തിലായിരുന്നു ചികിത്സകൾ നടന്നിരുന്നത്.
കെ പി സി സി യുടെ വര്ക്കിങ് പ്രസിഡന്റും, 2016 മുതല് തൃക്കാക്കരയില് നിന്നുള്ള നിയമസഭാംഗവും 2009–2014 കാലഘട്ടത്തില് ലോക്സഭയില് അംഗവുമായിരുന്നു.
ഇടുക്കി ജില്ലയിലെ രാജമുടിയിലെ ഉപ്പുതോട് പഞ്ചായത്തില് പുതിയപറമ്പിൽ തോമസിന്റെയും അന്നമ്മയുടേയും മകനാണ്. നിയമബിരുദം നേടിയിട്ടുണ്ട്. തൊടുപുഴ ന്യൂമാന് കോളേജ്, മാര് ഇവാനിയോസ് കോളേജ് തിരുവനന്തപുരം, മഹാരാജാസ് കോളേജ് എറണാകുളം, ഗവ.ലോ കോളേജ് എറണാകുളം, കോഴിക്കോട് എന്നിവിടങ്ങളിലായിരുന്നു വിദ്യാഭ്യാസം.
കോണ്ഗ്രസിന്റെ വിദ്യാര്ത്ഥി സംഘടനയായ കെഎസ് യുവിലൂടെയാണ് പൊതുരംഗത്ത് എത്തുന്നത്.കെഎസ്യു യൂണിറ്റ് വൈസ് പ്രസിഡന്റ്, കോളേജ് യൂണിയന് ജനറല് സെക്രട്ടറി, ഇടുക്കി ജില്ലാ പ്രസിഡന്റ്, സംസ്ഥാന ജനറല് സെക്രട്ടറി, സംസ്ഥാന പ്രസിഡന്റ് എന്നീ നിലകളില് പ്രവര്ത്തിച്ചു. 1980-ല് യൂത്ത് കോണ്ഗ്രസ് സംസ്ഥാന ജനറല് സെക്രട്ടറിയായ തോമസ് 1980 മുതല് കെ.പി.സി.സി, എ.ഐ.സി.സി അംഗമാണ്. 1990-ല് ഇടുക്കി ജില്ലാ കൗണ്സില് അംഗമായി.
1991, 2001 നിയമസഭ തിരഞ്ഞെടുപ്പുകളില് തൊടുപുഴയില് നിന്നും 2016-ലെ നിയമസഭ തിരഞ്ഞെടുപ്പില് തൃക്കാക്കരയില് നിന്നും നിയമസഭാംഗമായി.
2007-ല് ഇടുക്കി ഡി.സി.സിയുടെ പ്രസിഡന്റായി. 2009-ലെ ലോക്സഭ തിരഞ്ഞെടുപ്പില് ഇടുക്കിയില് നിന്ന് ലോക്സഭയിലേയ്ക്ക് തിരഞ്ഞെടുക്കപ്പെട്ടു. എഡിബിയും പ്രത്യയശാസ്ത്രങ്ങളും എന്ന പുസ്തകം രചിച്ചിട്ടുണ്ട്.
ഭാര്യ: ഉമ തോമസ്. മക്കള്: വിഷ്ണു തോമസ്, വിവേക് തോമസ്
Discussion about this post