ലഖ്നൗ: ഉത്തർ പ്രദേശിൽ തെരഞ്ഞെടുപ്പ് അടുത്തിരിക്കെ നിർണായക രാഷ്ട്രീയ നീക്കങ്ങൾ തുടരുന്നു. ബിജെപി മന്ത്രിമാരെയും എം എൽ എമാരെയും അടർത്തിയെടുക്കാൻ ശ്രമിച്ച സമാജ് വാദി പാർട്ടി നേതാവ് അഖിലേഷ് യാദവിന്റെ കുടുംബത്തിൽ ബിജെപിയുടെ സർജിക്കൽ സ്ട്രൈക്ക്. അഖിലേഷിന്റെ ഇളയ സഹോദരന്റെ ഭാര്യ അപർണ യാദവ് ബിജെപിയിൽ ചേർന്നതിന് പിന്നാലെ മറ്റൊരു അടുത്ത ബന്ധു കൂടി ബിജെപിയിലേക്ക്.
മുതിർന്ന നേതാവും അഖിലേഷിന്റെ പിതാവുമായ മുലായം സിംഗ് യാദവിന്റെ രണ്ടാം ഭാര്യ സാധനാ ഗുപ്തയുടെ സഹോദരനായ പ്രമോദ് ഗുപ്തയും ബിജെപിയിൽ ചേരുമെന്നാണ് സൂചന. കഴിഞ്ഞ സമാജ് വാദി പാർട്ടി മന്ത്രിസഭയിൽ അംഗമായിരുന്ന ശിവകുമാർ ബേരിയയും പ്രമോദ് ഗുപ്തയ്ക്കൊപ്പം ബിജെപിയിൽ ചേരാൻ ഒരുങ്ങുന്നതായാണ് വിവരം. നിലവിൽ പി എസ് പി നേതാവാണ് ബേരിയ.
നേരത്തെ സമാജ് വാദി പാർട്ടിയെ ഞെട്ടിച്ച് മുലായം സിംഗ് യാദവിന്റെ മരുമകളും അഖിലേഷ് യാദവിന്റെ സഹോദര പത്നിയുമായ അപർണ യാദവ് ബിജെപിയിൽ ചേർന്നിരുന്നു. സമാജ് വാദി പാർട്ടിക്കും അഖിലേഷിനും കനത്ത തിരിച്ചടിയായാണ് ഈ നീക്കം വിലയിരുത്തപ്പെടുന്നത്.
