കൊച്ചി: പ്രശസ്ത നടി കെ പി എ സി ലളിത അന്തരിച്ചു. 75 വയസ്സായിരുന്നു. ഏറെ നാളായി അസുഖബാധിതയായി ചികിത്സയിലായിരുന്നു. തൃപ്പൂണിത്തുറയിലുള്ള, മകന്റെ ഫ്ലാറ്റിൽ വച്ചായിരുന്നു അന്ത്യം.
നാടകത്തിൽ നിന്നും ചലച്ചിത്ര രംഗത്തേക്ക് കടന്നു വന്ന കെപിഎസി ലളിതയ്ക്ക് 2 തവണ ദേശീയ അവാർഡ് ലഭിച്ചിട്ടുണ്ട്. കെ എസ് സേതുമാധവന്റെ കൂട്ടൂകുടുംബം ആണ് ആദ്യ ചിത്രം. 550 ലധികം ചിത്രങ്ങളിൽ അഭിനയിച്ചിട്ടുണ്ട്.
കായംകുളം രാമപുരത്ത് കടയ്ക്കല് തറയില് അനന്തന്നായരുടെയും ഭാര്ഗവി അമ്മയുടെയും മകളായി 1947 മാര്ച്ച് പത്തിന് ഇടയാറന്മുളയിലാണ് കെ പി എ സി ലളിത ജനിച്ചത്. മഹേശ്വരി എന്നായിരുന്നു യഥാര്ഥ പേര്. പത്താം വയസ്സിൽ ചങ്ങനാശ്ശേരി ഗീഥയുടെ ‘ബലി’യെന്ന നാടകത്തിലൂടെ കെ.പി.എ.സി.യിലെത്തി.
നിങ്ങളെന്നെ കമ്മ്യൂണിസ്റ്റാക്കി, ഒതേനന്റെ മകന്, വാഴ്വെ മായം, ത്രിവേണി, അനുഭവങ്ങള് പാളിച്ചകള്, ഒരു സുന്ദരിയുടെ കഥ, സ്വയംവരം തുടങ്ങി സത്യനും പ്രേം നസീറിനുമൊപ്പം നിരവധി സിനിമകളിൽ അഭിനയിച്ചു. വിയറ്റ്നാം കോളനിയിലെ പട്ടാളം മാധവിയും കൊട്ടയം കുഞ്ഞച്ചനിലെ ഏലിയാമ്മയും വേറിട്ട വേഷങ്ങളായിരുന്നു. ഭരതന്റെ അമരം, ജയരാജിന്റെ ശാന്തം എന്നീ ചിത്രങ്ങളിലെ അഭിനയത്തിന് ദേശീയ പുരസ്കാരം നേടി. നീല പൊന്മാന്, ആരവം, അമരം, കടിഞ്ഞൂല്കല്യാണം- ഗോഡ്ഫാദര്-സന്ദേശം തുടങ്ങിയ ചിത്രങ്ങളിലെ അഭിനയത്തിന് നാലുതവണ സംസ്ഥാന പുരസ്കാരവും കരസ്ഥമാക്കി.
കാതലുക്ക് മര്യാദൈ, മണിരത്നത്തിന്റെ അലൈപായുതേ, കാട്രുവെളിയിടെ തുടങ്ങിയവയാണ് ശ്രദ്ധേയ തമിഴ്ചിത്രങ്ങള്.
അന്തരിച്ച സംവിധായകൻ ഭരതനായിരുന്നു ഭർത്താവ്. നടനും സംവിധായകനുമായ സിദ്ധാർത്ഥ്, ശ്രീക്കുട്ടി എന്നിവർ മക്കളാണ്.
Discussion about this post