എല്ലാ ആരോഗ്യപാനീയങ്ങൾക്കും അതിൻറേതായ ഗുണങ്ങളുണ്ട്.എന്നാൽ ശരീര ഭാരം കുറയ്ക്കാൻ ഏതെങ്കിലും ചായകളോ പാനീയങ്ങളോ സഹായിക്കുമോ? ശരീരഭാരം കുറയ്ക്കാൻ ഭക്ഷണ നിയന്ത്രണവും വ്യായാമവും തന്നെയാണ് ഏറ്റവും എളുപ്പവഴി. എന്നാൽ ചില ആരോഗ്യപാനീയങ്ങൾ കൃത്യമായ ഭക്ഷണനിയന്ത്രണത്തിനും വ്യായാമത്തിനുമൊപ്പം ഉപയോഗിച്ചാൽ ഫലം കൂടുതൽ നന്നാവുമെന്നാണ് അനുഭവം. ശൈത്യകാലത്ത് നമ്മെ അത്തരത്തിൽ സഹായിയ്ക്കുന്ന ഒരു ഉത്തമ പാനീയമാണ് മഞ്ഞൾ ചായ.
യോഗയും വ്യായാമവും മുതൽ പലതരം ഭക്ഷണനിയന്ത്രണങ്ങളും പരീക്ഷിച്ച് മടുത്തവരാണ് നമ്മളിൽ പലരും. ശൈത്യകാലത്ത് നാം കൂടുതൽ ഭക്ഷണം കഴിയ്ക്കും. ഒപ്പം ക്രിസ്തുമസ്, പുതുവത്സരം പോലെയുള്ള ആഘോഷ സമയവും. അതുകൊണ്ടുതന്നെ ഈ സമയത്ത് ശരീരഭാരവും എളുപ്പം കൂടും. ഇവിടെയാണ് മഞ്ഞൾ ചായ ഉപകാരപ്പെടുന്നത്. വിദേശ രാജ്യങ്ങളിലൊക്കെ വലിയ കോഫീഷോപ്പുകളിൽ ഇപ്പോൾ ഇഷ്ടപാനീയമാണ് മഞ്ഞൾ ചായ.
എന്താണ് മഞ്ഞൾ ചായ?
തിളപ്പിച്ച പാലിൽ ഒന്നോ രണ്ടോ സ്പൂൺ മഞ്ഞളും ഒരു നുള്ള് കുരുമുളകും ചേർത്താൽ മഞ്ഞൾ ചായയായി. മധുരം ഒഴിവാക്കാനാകാത്തവർക്ക് അൽപ്പം പഞ്ചസാരയോ തേനോ ചേർക്കാം. പാലിനു പകരം ഓട്സ് മിൽക്കോ ബദാം മിൽക്കോ ഉപയോഗിക്കാം. ചൂടോടെ കുടിച്ചാൽ ഏറെ ഉത്തമം.
ശരീരഭാരം കുറയ്ക്കാൻ മഞ്ഞളും കുരുമുളകും എങ്ങനെയാണ് സഹായിക്കുന്നത്? ഇതിൻറെ ഗുണങ്ങളെന്തൊക്കെയാണ് ?
മഞ്ഞളിൽ രോഗപ്രതിരോധശേഷി വർദ്ധിപ്പിക്കുന്ന അനേകം പദാർത്ഥങ്ങളുണ്ട്. കുർകുമിനോയ്ഡുകൾ എന്ന് വിളിക്കുന്ന അവ ആൻറി-ഇൻഫ്ലമേറ്ററി, ആന്റിഓക്സിഡന്റ് ഗുണങ്ങളുള്ളതാണ്. ശരീരത്തിലെ വേദനകൾ കുറയ്ക്കാനും രോഗാണുക്കളെ പ്രതിരോധിക്കാനും മഞ്ഞളിന് അത്ഭുതകരമാം വണ്ണം കഴിവുണ്ട്. ഇത് ശരീരത്തിലെ വിഷാംശത്തെ പുറന്തള്ളുകയും ചെയ്യും.
കുരുമുളകിൽ അടങ്ങിയിട്ടുള്ള പൈപ്പറിൻ ദഹനം എളുപ്പത്തിലാക്കുന്നു. ശരീരത്തിൽ കൊഴുപ്പ് അടിഞ്ഞുകൂടുന്നത് കുറയ്ക്കാനും കുരുമുളക് സഹായിക്കുന്നു. ശരീരത്തിലേക്ക് പോഷകങ്ങൾ ആഗിരണം ചെയ്യുന്നതിനും ആരോഗ്യം വർദ്ധിപ്പിക്കുന്നതിനും കുരുമുളക് സഹായിക്കുന്നു. മഞ്ഞളിലുള്ള കുർകുമിൻ സാധാരണഗതിയിൽ ശരീരത്തിൽ ആഗിരണം ചെയ്യപ്പെടില്ല. എന്നാൽ കുരുമുളകിലുള്ള പെപ്പറിൻ എന്ന പദാർത്ഥത്തിൻ്റെ സാന്നിദ്ധ്യത്തിൽ കുർകുമിൻ വളരെ വേഗത്തിൽ ശരീരത്തിൽ ആഗിരണം ചെയ്യപ്പെടും.
കൃത്യമായ ഭക്ഷണനിയന്ത്രണം, മിതമായ വ്യായാമം എന്നിവയോടൊപ്പം ദിവസേന ഒരു മഞ്ഞൾ ചായ ശീലമാക്കിയാൽ രോഗപ്രതിരോധ ശേഷി വർദ്ധിയ്ക്കും, ഡയറ്റിൻ്റെ ഭാഗമായുണ്ടാകുന്ന മാലിന്യങ്ങൾ ശരീരത്തിൽ നിന്ന് പുറന്തള്ളപ്പെടും. വ്യായാമത്തിൻ്റെ ക്ഷീണത്തിൽ കുറവുണ്ടാകും.
നമ്മുടെ മുത്തശ്ശിമാർ പണ്ട് ജലദോഷം വരുമ്പോൾ മഞ്ഞളും കുരുമുളകുമിട്ട് പാലുകാച്ചി കൊടുത്തിരുന്നത് ഇന്ന് സ്റ്റാർബക്സിലേയും കോസ്റ്റ കഫേയിലേയും സ്റ്റാർ ഐറ്റമാണ്.
