മറ്റു മതസ്ഥർക്ക് ആശംസകൾ കൈമാറുന്നതിൽ മുസ്ലിം മത വിശ്വാസികളെ ഇസ്ലാം വിലക്കിയിട്ടില്ലെന്ന് മുസ്ലിം വേൾഡ് ലീഗ് മേധാവി ഷെയ്ഖ് ഡോ. മുഹമ്മദ് അൽ-ഇസ. ക്രിസ്മസ് ആശംസകൾ കൈമാറുന്നതുമായി ബന്ധപ്പെട്ട വിവാദങ്ങളിലാണ് ഡോ. മുഹമ്മദ് അൽ-ഇസയുടെ അഭിപ്രായ പ്രകടനം. ‘അറബ് ന്യൂസ്’ ആണ് മുഹമ്മദ് അൽ ഇസയുടെ അഭിപ്രായം പുറത്തുവിട്ടിരിക്കുന്നത്.
വിഷയത്തെ അടിസ്ഥാനമാക്കിയാണ് എതിർപ്പ് അറിയിക്കേണ്ടത്, അനുമാനങ്ങൾക്ക് അനുസരിച്ചല്ല ഒന്നും എതിർക്കപ്പെടേണ്ടതെന്നാണ് ഷെയ്ഖ് ഡോ. മുഹമ്മദ് അൽ-ഇസയുടെ അഭിപ്രായം. ക്രിസ്ത്യാനികൾക്ക് ആശംസകൾ അറിയിക്കുന്നതിൽ നിന്ന് മുസ്ലീങ്ങളെ വിലക്കുന്ന ഒരു വാചകവും ശരിയത്ത് നിയമത്തിൽ ഇല്ലെന്നും പറഞ്ഞു.
മറ്റ് മതസ്ഥരുടെ വിശേഷ ദിവസങ്ങളിൽ ആശംസകൾ കൈമാറുന്നത് സംബന്ധിച്ച് ഫത്വകൾ പുറപ്പെടുവിച്ചത് ഇസ്ലാമിക ലോകത്തെ മുതിർന്ന പണ്ഡിതന്മാരാണ്. ക്രിസ്ത്യാനികൾക്ക് ആശംസകൾ അറിയിക്കുന്നതിൽ നിന്ന് മുസ്ലീങ്ങളെ വിലക്കുന്ന ഒരു വാചകവും ശരിയത്ത് നിയമത്തിൽ ഇല്ലെന്നും മുഹമ്മദ് അൽ-ഇസ പറഞ്ഞു. നിയമശാസ്ത്രവുമായി ബന്ധപ്പെട്ട ഒരു വിഷയത്തിലും എതിർപ്പ് പ്രകടിപ്പിക്കുന്നത് ശരിയത്തിൽ അനുവദനീയമല്ലെന്നും അദ്ദേഹം ചൂണ്ടിക്കാട്ടി.
അത്തരം ആശംസകൾ നിരോധിക്കുന്ന ഒരു മതഗ്രന്ഥവും ഇല്ല. ഒരു മുസ്ലീം അമുസ്ലിമിനെ അഭിവാദ്യം ചെയ്യുമ്പോൾ, അവൻ മറ്റൊരു വിശ്വാസത്തെ അംഗീകരിക്കുന്നു എന്നല്ല അർത്ഥമെന്നും അൽ-ഇസ പറഞ്ഞു. ലോകത്ത് സഹവർത്തിത്വവും ഐക്യവും പ്രോത്സാഹിപ്പിക്കുക എന്നതാണ് ആശംസകളുടെ ഉദ്ദേശം എന്നും അദ്ദേഹം വ്യക്തമാക്കി.
Discussion about this post