പമ്പ; തങ്ക അങ്കി ഘോഷയാത്രയെ എതിരേൽക്കാനെത്തിയ പത്തനംതിട്ട ജില്ലാ കളക്ടർ ദിവ്യ എസ് അയ്യരുടെ വീഡിയോ സമൂഹമാദ്ധ്യമങ്ങളിൽ വൈറൽ ആകുന്നു. പമ്പയിലെ നടപ്പന്തലിൽ മകനെ ഒക്കത്തെടുത്ത് ശരണം വിളിക്കുന്ന കളക്ടറുടെ ദൃശ്യങ്ങളാണ് സമൂഹമാദ്ധ്യമങ്ങളിലൂടെ പുറത്തുവന്നത്.
കഴിഞ്ഞ ദിവസം നടന്ന ചടങ്ങിന്റെ വീഡിയോ പുറത്തുവന്നത് ഇന്നാണ്. ഇന്നലെ മണ്ഡലപൂജയ്ക്കായിട്ടാണ് ആറൻമുള പാർത്ഥസാരഥി ക്ഷേത്രത്തിൽ നിന്നും ഘോഷയാത്രയായി തങ്ക അങ്കി ശബരിമലയിൽ എത്തിച്ചത്. തിങ്കളാഴ്ച പമ്പയിൽ ഘോഷയാത്ര എത്തിയപ്പോഴാണ് ജില്ലാ കളക്ടർ മകനെയും കൂട്ടി തങ്ക അങ്കി ദർശിക്കാനും മണ്ഡലപൂജയുടെ മുന്നൊരുക്കങ്ങൾ വിലയിരുത്താനും എത്തിയത്.
ഭക്തിസാന്ദ്രമായ അന്തരീക്ഷത്തിൽ കാത്തുനിന്ന ഭക്തർക്കൊപ്പമാണ് മകനെയും ഒക്കത്തെടുത്ത് കളക്ടർ ശരണം വിളിക്കുന്നത്. മൊബൈലിൽ പകർത്തിയ ദൃശ്യങ്ങളാണ് സമൂഹമാദ്ധ്യമങ്ങളിലൂടെ പ്രചരിക്കുന്നത്. കഴിഞ്ഞ വർഷം തങ്ക അങ്കിയെ സ്വീകരിക്കാനെത്തിയ ദിവ്യ എസ് അയ്യർ അയ്യപ്പകീർത്തനം ആലപിക്കുന്ന ദൃശ്യങ്ങളും സമൂഹമാദ്ധ്യമങ്ങളിൽ വൈറൽ ആയിരുന്നു.
പവിത്രമായ തങ്ക അങ്കി ഘോഷയാത്ര പമ്പയിൽ എത്തി സ്വീകരിച്ചതായും ശരണമന്ത്രഘോഷത്തോടെ സന്നിധാനത്തിലേക്ക് യാത്രയയച്ചതായും ചിത്രങ്ങൾ സഹിതം കളക്ടർ ഔദ്യോഗിക ഫേസ്ബുക്ക് പേജിൽ കുറിച്ചിരുന്നു. തീർത്ഥാടകരോട് ശബരിമല യാത്രയുടെ വിശേഷങ്ങൾ ചോദിച്ചറിഞ്ഞ ശേഷമാണ് കളക്ടർ മടങ്ങിയത്. ദേവസ്വം വകുപ്പ് മന്ത്രി കെ.രാധാകൃഷ്ണൻ, എം.എൽ.എ ജനീഷ്കുമാർ എന്നിവരും പമ്പയിൽ ഉണ്ടായിരുന്നു.
നേരത്തെ റവന്യൂ കലോത്സവത്തിൽ ജീവനക്കാർക്കൊപ്പം തിരുവാതിര കളിക്കുന്നതിന്റെയും വിവിധ പരിപാടികളിൽ ദിവ്യ എസ് അയ്യർ പാട്ട് പാടുന്നതിന്റെയും ഒക്കെ വീഡിയോ ദൃശ്യങ്ങൾ സമൂഹമാദ്ധ്യമങ്ങൾ ആവേശത്തോടെയാണ് ഏറ്റെടുത്തത്.
Discussion about this post