ന്യൂഡൽഹി: പ്രധാനമന്ത്രിയെ അവഹേളിച്ച് കോൺഗ്രസ്. കോൺഗ്രസ് വക്താവ് പവൻ ഖേരയാണ് പ്രധാനമന്ത്രി നരേന്ദ്രമോദിയെയും അദ്ദേഹത്തിന്റെ അന്തരിച്ച പിതാവിനെയും അവഹേളിച്ചത്.
ഇന്ന് ഒരു പത്രസമ്മേളനത്തിൽ സംസാരിക്കുന്നതിനിടെയാണ് പവൻ ഖേര പ്രധാനമന്ത്രി നരേന്ദ്ര മോദിയുടെ അന്തരിച്ച പിതാവിനെ പരിഹസിച്ചത്. പ്രധാനമന്ത്രിയെ’നരേന്ദ്ര ഗൗതം ദാസ് മോദി’ എന്നാണ് പവൻ ഖേര വിളിച്ചത്. ” നരേന്ദ്ര ഗൗതം ദാസ് മോദിക്ക് എന്ത് പ്രശ്നമുണ്ട്?’, ഗൗതം ദാസാണോ ദാമോദർ ദാസാണോ? എന്ന് പവൻ ഖേര ചോദിച്ചു. പേര് ദാമോദർ ദാസ് എന്നാണെങ്കിലും, തന്റെ പ്രവർത്തനങ്ങൾ ഗൗതം ദാസിന് സമാനമാണ്. പ്രധാനമന്ത്രി മോദിയുടെ പിതാവിന്റെ പേര് ദാമോദർദാസ് മുൽചന്ദ് മോദി എന്നാണ്. ഇതാണ് ഗൗതം ദാസ് എന്ന് വിളിച്ച് അവഹേളിച്ചത്.
ഇതാദ്യമായല്ല പ്രധാനമന്ത്രിയെ കോൺഗ്രസ് ലക്ഷ്യമിടുന്നതെന്ന് ബിജെപി നേതാവ് അമിത് മാളവ്യ വിമർശിച്ചു. ‘സാധാരണക്കാരനായ ഒരാൾ ഇത്രയും ജനകീയ നേതാവായി ഉയർന്നത് അംഗീകരിക്കാൻ അവർക്ക് ഇപ്പോഴും കഴിഞ്ഞിട്ടില്ല. പാർട്ടിയിൽ ഇത്തരം ഘടകങ്ങളെ ഗാന്ധിമാർ പ്രോത്സാഹിപ്പിക്കുന്നുവെന്ന് അമിത് മാളവ്യ കുറ്റപ്പെടുത്തി.
പവൻ ഖേരയുടെ പരമാർശത്തിനെതിരെ നിരവധി പേരാണ് രംഗത്തെത്തിയിരിക്കുന്നത്. രാജ്യത്തിന്റെ പ്രധാനമന്ത്രിയെയും അദ്ദേഹത്തിന്റെ പിതാവിനെയും അവഹേളിച്ചത് നാക്കുപിഴയായി കണക്കാക്കാനാവില്ലെന്നാണ് വിമർശം.
