മേരി ആന് ക്ലിഫ്ടണ് 108 വയസ്സായി. ബ്രിട്ടനിലെ ഓര്പിംഗ്ടണ് സ്വദേശിനിയായ അവര് ദീര്ഘായുസ്സ് സ്വന്തമാക്കാന് എല്ലാവര്ക്കും ഒരു ഉപദേശം നല്കിയിരിക്കുകയാണ്. കേള്ക്കുമ്പോള് ചിലരൊക്കെ നെറ്റി ചുളിക്കുമെങ്കിലും തനിക്ക് ഇതുവരെ അതുകൊണ്ട് ഒരു ദോഷവും ഉണ്ടായിട്ടില്ലെന്ന ഉറപ്പും റോസിന എന്ന വിളിപ്പേരുള്ള അവര് നല്കുന്നു.
ഉച്ചഭക്ഷണസമയത്തെ മദ്യപാനമാണ് തന്റെ ദീര്ഘായുസ്സിന്റെയും സന്തോഷ ജീവിതത്തിന്റെയും രഹസ്യമായി റോസിന കരുതുന്നത്. ഈ പതിവ് കാരണം തനിക്ക് ഒരു ദോഷവും ഉണ്ടായിട്ടില്ലെന്ന് അവര് സാക്ഷ്യപ്പെടുത്തുന്നുണ്ട്. കഠിനാധ്വാനം ചെയ്യണമെന്നത് ശരിയാണെങ്കിലും ജീവിതം അതിലും നന്നായി ആസ്വദിക്കണമെന്നും ഈ മുത്തശ്ശി പറയുന്നു.
1915 മാര്ച്ച് 16നാണ് സൗത്ത് ലണ്ടനിലെ ലാംബെത്തില് റോസിന ജനിക്കുന്നത്. സ്കൂള് പഠനത്തിന് ശേഷം തയ്യല് ജോലി ചെയ്തു. അതിനുശേഷം മകളുടെ പ്രിന്റിംഹ് ബിസിനസില് പങ്കാളിയായി. ബിബിസി റിപ്പോര്ട്ട് പ്രകാരം, 12 വയസ്സുള്ളപ്പോഴാണ് റോസിന തന്റെ പങ്കാളിയായ എര്നിയെ കാണുന്നത്. ഇവര്ക്ക് പമേല, ബെര്നീ എന്നിങ്ങനെ പേരുകളുള്ള രണ്ട് മക്കളുണ്ട്. നാല് പേരക്കുട്ടികളും പത്ത് പേരക്കുട്ടികളുടെ മക്കളുമായി സന്തോഷജീവിതം നയിക്കുകയാണ് ഇപ്പോള് റോസിന.
കഴിഞ്ഞിടെ റോസിനയുടെ ജീവിതത്തിലെ ഈ വലിയ നേട്ടം യുകെയിലെ ഫോക്സ്ബ്രിഡ്ജ് ഹൗസ് വിരുന്നൊരുക്കി ആഘോഷിച്ചു. ബ്രിട്ടന് രാജാവില് നിന്നുള്ള ആശംസകളും അന്ന് റോസിനയ്ക്ക് ലഭിച്ചു.
