എല്ലാ സ്ത്രീകളും ജീവിതത്തിൽ ഒരിക്കലെങ്കിലും ഒറ്റയ്ക്ക് യാത്രപോകണം. ഒറ്റയ്ക്കുള്ള യാത്ര ഒരു സ്ത്രീക്ക് നൽകുന്ന കരുത്തും അനുഭവവും വളരെ വലുതാണ്. മുന്നോട്ടുള്ള ജീവിതത്തിൽ സ്വതന്ത്രയായി, ആരെയും ആശ്രയിക്കാതെ ജീവിക്കാൻ അത്തരം യാത്രകളിലൂടെ കൈവരുന്ന ആത്മവിശ്വാസം മാത്രം മതി. എങ്കിലും ഒറ്റയ്ക്കൊരു യാത്ര പോകാൻ ഇപ്പോഴും സ്ത്രീകൾക്ക് പേടിയാണ്, പ്രത്യേകിച്ച് ദൂരയാത്രകൾ. സുരക്ഷ തന്നെയാണ് പ്രധാന പ്രശ്നം. അറിയാത്ത ഒരിടത്തേക്ക് തനിയെ പോകേണ്ടി വരുമ്പോൾ സ്ത്രീകൾ നേരിടുന്ന പലവിധ അതിക്രമങ്ങളുടെ വാർത്തകൾ നാം കേൾക്കാറുണ്ട്. പക്ഷേ അതോർത്ത് മടിച്ചിരുന്നാൽ ജീവിതത്തിൽ അത് ഒരു നഷ്ടം തന്നെയായി മാറും. ചില കാര്യങ്ങൾ ശ്രദ്ധിച്ചാൽ ഒറ്റയ്ക്കുള്ള യാത്ര യാതൊരു പേടിയും കൂടാതെ ആസ്വദിക്കാൻ സ്ത്രീകൾക്കാകും. അത്തരത്തിൽ ഒറ്റയ്ക്കുള്ള യാത്രയിൽ സുരക്ഷ ഉറപ്പാക്കാൻ സ്ത്രീകൾ ശ്രദ്ധിക്കേണ്ട ചില കാര്യങ്ങളിതാ.
ലക്ഷ്യസ്ഥാനത്തെ കുറിച്ച് മതിയായ വിവരങ്ങൾ അന്വേഷിച്ച് വെക്കുക
യാത്ര പുറപ്പെടുന്നതിന് മുമ്പായി ലക്ഷ്യസ്ഥാനത്തെ കുറിച്ച് എല്ലാ കാര്യങ്ങളും അറിഞ്ഞുവെക്കുക. ഉദാഹരണത്തിന് അവിടെ സുരക്ഷ പ്രശ്നങ്ങൾ എന്തെങ്കിലും ഉണ്ടോ, അവിടുത്തെ സാംസ്കാരിക പ്രത്യേകതകളും ചിട്ടകളും എന്തൊക്കെയാണ്, പ്രാദേശികമായ നിയമങ്ങൾ എന്തൊക്കെയാണ് തുടങ്ങിയ കാര്യങ്ങൾ. ലക്ഷ്യസ്ഥാനത്തെത്തിയാൽ എവിടെയൊക്കെ പോകണം, എത്തരത്തിലുള്ള വസ്ത്രങ്ങളായിരിക്കും അനുയോജ്യം, പെരുമാറ്റരീതികളിൽ എന്തൊക്കെ ശ്രദ്ധിക്കണം തുടങ്ങിയ കാര്യങ്ങളിൽ തീരുമാനങ്ങളെടുക്കാൻ അത്തരം കാര്യങ്ങളിലുള്ള അറിവ് ഉപകാരപ്പെടും.
യാത്രാവിവരങ്ങൾ അടുപ്പമുള്ളവരുമായി പങ്കുവെക്കുക
നിങ്ങളുടെ യാത്രയെ കുറിച്ചും കൊണ്ടുപോകുന്ന സാധനങ്ങളെ കുറിച്ചുമെല്ലാം ഉള്ള വിവരങ്ങൾ അടുത്ത സുഹൃത്തുക്കളുമായും കുടുംബവുമായും പങ്കുവെക്കുന്നത് നല്ലതാണ്. വിശ്വാസമുള്ള ഒരാളുമായി നമ്മുടെ ലൊക്കേഷൻ വിവരങ്ങൾ പങ്കുവെക്കുന്നതും നല്ല കാര്യമാണ്. പേഴ്സണൽ സേഫ്റ്റി അലാറം കയ്യിൽ വെക്കുന്നതും ഒരു സേഫ്റ്റി ആപ്പ് ഡൗൺലോഡ് ചെയ്യുന്നതുമെല്ലാം നല്ലതാണ്.
അന്യദേശക്കാരിയാണെന്ന തോന്നലുണ്ടാക്കാതിരിക്കുക
ഒരിടത്ത് ചെന്നുകഴിഞ്ഞാൽ സഞ്ചാരിയായി മാറിനിൽക്കാതെ അവിടെയുള്ളവരാകാൻ ശ്രമിക്കുക. വിലകൂടിയ സാധനങ്ങളോ ആഭരണങ്ങളോ യാത്രയിൽ പരമാവധി ഒഴിവാക്കുക.
അപരിചതരോട് ശ്രദ്ധാപൂർവ്വം ഇടപഴകുക
ഒറ്റയ്ക്കുള്ള യാത്രകളിൽ അപരിചിതരുമായി ഇടപെടേണ്ടി വരുന്നത് സാധാരണമാണ്. വളരെ സൗഹാർദ്ദമായി, തുറന്ന മനസ്സോടെ വേണം ആളുകളോട് ഇടപെടാൻ എങ്കിലും കരുതൽ വേണം. വ്യക്തിപരമായ വിവരങ്ങൾ പരമാവധി അവരുമായി പങ്കിടാതിരിക്കുക. അറിയാത്തവരുടെ ഒരു ക്ഷണങ്ങളും സ്വീകരിക്കാതിരിക്കുക. എന്തെങ്കിലും പന്തികേട് തോന്നിയാൽ അത്തരക്കാരിൽ നിന്നും ഒഴിഞ്ഞുമാറുക.
അടിയന്തര സാഹചര്യങ്ങളെ കരുതിയിരിക്കുക
പ്രഥമശുശ്രൂഷയ്ക്കാവശ്യമായ സാധനങ്ങൾ യാത്രയിൽ ഒപ്പം കരുതുക. ഒപ്പം യാത്രാരേഖകളുടെ കോപ്പി, ആവശ്യമായ മരുന്നുകൾ എന്നിവയെല്ലാം ബാഗിൽ കരുതുക. ലക്ഷ്യസ്ഥാനത്തെ എമർജൻസി സേവനങ്ങളെ കുറിച്ചും അവ പ്രാപ്തമാകുന്ന വഴികളെ കുറിച്ചും അറിഞ്ഞുവെക്കുക.
Discussion about this post