ചിറകുകള്ക്കടിയില് മരണത്തിന്റെ മണം ഒളിപ്പിച്ചുവെച്ച പക്ഷികള്! ഭാവനയൊന്നുമല്ല, സംഗതി സത്യമാണ്. നമ്മള് സാധാരണ കാണുന്ന പക്ഷികളെ പോലെ ഒന്നു തലോടി ഓമനിക്കാന് ശ്രമിച്ചാല് തനിനിറം കാണിക്കുന്ന പക്ഷികളെ കുറിച്ചാണ് പറയാന് പോകുന്നത്. ഡാനിഷ് ഗവേഷകര് കഴിഞ്ഞിടെ കണ്ടെത്തിയ രണ്ട് പുതിയ ഇനം പക്ഷികള് വളരെ അപകടകാരികളാണ്.അപകടകാരികള് എന്ന് മാത്രം പറഞ്ഞാല് പോരാ, കണ്ടാല് നല്ല സുന്ദരിക്കിളികളാണെങ്കിലും എന്നെ തൊട്ടാല് കൊന്നുകളയും ഞാന് എന്ന ഭീഷണിയോടെയാണ് ഇവയുടെ നില്പ്പ്.
ന്യൂ ജനീവയിലെ കാടുകളില് കാണപ്പെടുന്ന ഈ പക്ഷികള് ജനിതക പരിണാമത്തിലൂടെ ആര്ജ്ജിച്ചെടുത്തതാണ് തൊടുന്നവരെ വകവരുത്താനുള്ള കഴിവ്. ചിറകുകള്ക്കടിയില് വളരെ മാരകമായ ന്യൂറോടോക്സിനുകളാണ് ഇവ ഒളിപ്പിച്ചുവെച്ചിരിക്കുന്നത്. വിഷമുള്ള കായ്കനികള് കഴിച്ച് അവ തങ്ങളുടേതായ വിഷമാക്കി മാറ്റാന് ഇവയ്ക്ക് സാധിക്കും. മാരകമായ വിഷങ്ങളെ അതിജീവിക്കുമെന്ന് മാത്രമല്ല, അവ ചിറകിനടിയില് സൂക്ഷിച്ചുവെക്കുമെന്നത് ഇവയുടെ അനവധി പ്രത്യേകതകളില് ഒന്നുമാത്രമാണ്.
അടുത്തിടെ നടത്തിയ ഒരു യാത്രയ്ക്കിടയിലാണ് ഈ രണ്ട് പുതിയ ഇനത്തിലുള്ള പക്ഷികളെ കണ്ടെത്താന് കഴിഞ്ഞതെന്ന് ഡെന്മാര്ക്കിലെ നാച്ചുറല് ഹിസ്റ്ററി മ്യൂസിയത്തിലെ ഗവേഷകനായ ക്നഡ് ജെ എന്സണ് പ്രസ്താവനയിലൂടെ അറിയിച്ചു. പാകിസെഫാല ഷ്ളെഗലി, അലെഡ്രിയാസ് റുഫിനുച എന്നീ വര്ഗ്ഗങ്ങളില് നിന്നുള്ളവരാണ് ഈ പക്ഷികള്. ഇതില് ആദ്യവിഭാഗത്തില് പെട്ട പക്ഷികള് ഇന്ഡോ-പസഫിക് മേഖലയില് ധാരാളമായി കണ്ടുവവരുന്ന കുടുംബത്തില് ഉള്പ്പെടുന്നവയാണ്.
ഒന്നു വെറുതെ തൊടുന്നവരെ പോലും കൊല്ലാന് ശേഷിയുള്ള, തെക്ക്, മധ്യ അമേരിക്കന് മേഖലകളില് കണ്ടുവരുന്ന വിഷത്തവളകളില് ഉള്ളതിന് സമാനമായ വിഷമാണ് ഈ പക്ഷികളിലും ഉള്ളത്. ചില പക്ഷികളും ഇത്തരത്തില് ശരീരത്തില് വിഷം ഒളിപ്പിച്ചുവെക്കുന്നു എന്നത് പ്രകൃതിയില് വിഷം പലതരത്തില് വ്യാപകമായി കാണപ്പെടുന്നുവെന്നാണ് സൂചന നല്കുന്നതെന്ന് ഗവേഷകര് അഭിപ്രായപ്പെട്ടു.
ബാട്രകോടോക്സിന് എന്നാണ് ഈ പക്ഷികള് ഒളിപ്പിച്ചുവെച്ചിരിക്കുന്ന വിഷത്തിന്റെ പേര്. വളരെ മാരകമായ ന്യൂറോടോക്സിന് ആണിത്. സ്വര്ണ്ണ വിഷത്തവളയില് കാണപ്പെടുന്നത് പോലെ ഉയര്ന്ന അളവില് ഈ വിഷം ഉണ്ടെങ്കില് അതുമായി നേരിയ സമ്പര്ക്കമുണ്ടായാല് പോലും പേശിവേദനയും ഹൃദയാഘാതവും ഉണ്ടാക്കി മരണകാരണമാകാന് ഈ വിഷത്തിന് കഴിയും. തവളകളില് കാണപ്പെടുന്ന അതേ ഇനത്തിലുള്ള വിഷമാണ് പക്ഷികളില് ഉള്ളതെന്നും സമ്പര്ക്കമുണ്ടാകുന്നവരുടെ ത്വക്കിലുള്ള പേശീകലകളെ തുറന്ന് കഠിനമായ കോച്ചിപ്പിടുത്തവും മരണവും ഉണ്ടാക്കാന് അവയ്ക്കാകുമെന്നും ഗവേഷകനായ കസണ് ബോഡവാറ്റ വിശദീകരിക്കുന്നു.
അതേസമയം ഇത്രയും മാരകമായ വിഷം പക്ഷികള്ക്ക് എങ്ങനെ ശരീരത്തിനുള്ളില് സൂക്ഷിക്കാന് കഴിയുന്നുവെന്നത് ആശ്ചര്യകരമാണ്. പരിണാമ പ്രക്രിയയിലൂടെ പക്ഷികള് ആര്ജ്ജിച്ചെടുത്താണ് ഈ ശേഷിയെന്ന് ഗവേഷകര് പറയുന്നു. അതായത്, സോഡിയം ചാനലുകളിലുണ്ടായ ജനിതക വ്യതിയാനമാണ് ഈ വിഷത്തെ അതിജീവിക്കാന് അവയ്ക്ക് ശേഷി നല്കുന്നത്.
Discussion about this post