ആലപ്പുഴ: മാവേലിക്കരയിൽ ഡി വൈ എഫ് ഐ നേതാവിന്റെ തല അടിച്ചുപൊട്ടിച്ച കേസിൽ 2 പേർ അറസ്റ്റിലായി. ഡി വൈ എഫ് ഐ മാങ്കാംകുഴി മേഖലാ സെക്രട്ടറി വെട്ടിയാർ പാറക്കുളങ്ങര ഷൈജി ഭവനത്തിൽ ഷഹനാസ് ഷൗക്കത്തലിയെ (35) തലക്കടിച്ചു കൊലപ്പെടുത്താൻ ശ്രമിച്ച കേസിൽ വെട്ടിയാർ ഷഹനാസ് മൻസിലിൽ ഷഹനാസ് (30), വെട്ടിയാർ മാമ്പ്ര കിഴക്കതിൽ ഷമീർ (27) എന്നിവരാണ് അറസ്റ്റിലായത്. ഇരുവരും എസ് ഡി പി ഐ പ്രവർത്തകരാണ്.
വ്യാഴാഴ്ച രാത്രി എട്ടരയോടെ വെട്ടിയാർ കിഴക്ക് ജുമാ മസ്ജിദിൽ വെച്ചായിരുന്നു സംഭവം. കല്ലും ആയുധങ്ങളും കൊണ്ടുള്ള ആക്രമണത്തിൽ തലക്ക് ഗുരുതര പരിക്കേറ്റ ഷഹനാസിനെ മാവേലിക്കര ജില്ലാ ആശുപത്രിയിൽ പ്രവേശിപ്പിച്ചിരുന്നു. നിസ്‌കാരത്തിന് ശേഷം പള്ളി വൃത്തിയാക്കിക്കൊണ്ടിരുന്നപ്പോൾ എസ് ഡി പി ഐ പ്രവർത്തകരായ ഷമീറും ഷഹനാസും ചേർന്ന് ആക്രമിക്കുകയായിരുന്നുവെന്ന് ഷഹനാസ് പറഞ്ഞു.
എസ്ഡിപിഐ ബാന്ധവത്തിന്റെ പേരിൽ സിപിഎമ്മിൽ ശക്തമായ വിഭാഗീയത നിലനിൽക്കുന്ന മേഖലയാണ് ആലപ്പുഴ. സിപിഎം ലോക്കൽ സെക്രട്ടറിക്ക് എസ്ഡിപിഐ കൊലക്കേസ് പ്രതികളുമായി ബന്ധമുണ്ടെന്ന് ആരോപിച്ച് ആലപ്പുഴയിൽ അടുത്തയിടെ സിപിഎമ്മിൽ നിന്നും പ്രവർത്തകർ കൂട്ടമായി പാർട്ടി വിട്ടിരുന്നു.
Discussion about this post