കോട്ടയം : ഡ്യൂട്ടിക്കിടെ ട്രെയിനിൽ വെച്ച് യുവതിയോട് അപമര്യാദയായി പെരുമാറിയ ടിടിഇ അറസ്റ്റിൽ. നിലമ്പൂർ-കൊച്ചുവേളി രാജ്യറാണി എക്സ്പ്രസിലെ ടിടിഇയും തിരുവനന്തപുരം സ്വദേശിയുമായ നിതീഷ് (35) ആണ് അറസ്റ്റിലായത്. തിരുവനന്തപുരം സ്വദേശിനിയുടെ പരാതിയിലാണ് കോട്ടയം റെയിൽവെ പോലീസ ഇയാളെ അറസ്റ്റ് ചെയ്തത്.
ഒറ്റയ്ക്ക് ട്രെയിനിൽ യാത്ര ചെയ്ത യുവതിയോട് ടിടിഇ അപമര്യാദയായി പെരുമാറുകയായിരുന്നു. ആലുവയിൽ വെച്ചാണ് സംഭവം നടന്നത്. യുവതിയെ യാത്രയാക്കുന്നതിനായി പിതാവ് എത്തിയപ്പോൾ ” മകൾ ഒറ്റയ്ക്കാണ് പോകുന്നത്, ശ്രദ്ധിക്കണം ” എന്ന് ടിടിഇയോട് പറഞ്ഞിരുന്നു. ഇത് മുതലെടുത്താണ് ഇയാൾ മോശമായി പെരുമാറിയത്.
യുവതിയോട് ആദ്യം കോച്ച് മാറാൻ ഇയാൾ ആവശ്യപ്പെട്ടു. പിന്നീട് കൈയ്യിൽ പിടിച്ച് വലിച്ചുവെന്നാണ് പരാതി. ടിടിഇയുടെ ശല്യം രൂക്ഷമായതോടെ യുവതി കൺട്രോൾ റൂമിൽ വിളിച്ച് പരാതിപ്പെടുകയായിരുന്നു. അറസ്റ്റിലായ ടിടിഇക്കെതിരെ ജാമ്യമില്ല വകുപ്പുകൾ പ്രകാരമാണ് കേസ് രജിസ്റ്റർ ചെയ്തത്.
