പ്രണയം മൂത്ത് സ്വന്തം രക്തം കൊണ്ട് പ്രേമലേഖനം എഴുതിയിരുന്നു കാമുകീകാമുകന്മാരുണ്ടായിരുന്നു പണ്ട്. പക്ഷേ കാലം മാറി. ഇന്നിപ്പോള് പ്രേമലേഖനമൊക്കെ ഔട്ട് ഓഫ് ഫാഷനാണ്. ഉള്ളിലുള്ളതൊക്കെ അപ്പപ്പോള് പ്രണയിയെ അറിയിക്കാന് ഇന്സ്റ്റന്റ് മെസ്സേജിംഗും വീഡിയോ കോളിംഗ് സൗകര്യവുമൊക്കെയുണ്ട്. ഇനിയിപ്പോള് നാലുപേര് കൂടി പ്രണയം അറിയണമെങ്കില് സോഷ്യല്മീഡിയയില് ഒരു റീലോ സ്റ്റോറിയോ ഒക്കെയാകാം. എങ്കിലും പ്രണയതീവ്രത പ്രകടിപ്പിക്കാന് ചില കടുംകൈകള് ചെയ്യുന്നവര്ക്ക് ഇന്നും പഞ്ഞമില്ല. പങ്കാളിയോടുള്ള പറഞ്ഞറിയിക്കാന് കഴിയാത്തത്ര ഇഷ്ടം ശരീരത്തില് പച്ചകുത്തി നടക്കുന്നവര് ഏറെയാണ്. പക്ഷേ നെറ്റിയില് ഭര്ത്താവിന്റെ പേര് പച്ചകുത്തുന്ന സംഭവം ഇതാദ്യമായിരിക്കും!
അതെ, സത്യമാണ്. ബെംഗളൂരുവിലാണ് ഒരു യുവതി ഭര്ത്താവിന്റെ പേര്, അത്യാവശ്യം നല്ല വലുപ്പത്തില് നെറ്റിയില് പച്ചകുത്തിയിരിക്കുന്നത്. പച്ചകുത്തുന്നതിന്റെ വീഡിയോ ടാറ്റൂ പാര്ലറായ കിംഗ് മെയ്ക്കര് ടാറ്റൂ സ്റ്റുഡിയോ സോഷ്യല്മീഡിയയില് പോസ്റ്റ് ചെയ്യുകയും ചെയ്തു. വീഡിയോ വൈറലായെങ്കിലും യുവതിയുടെ ഈ പ്രവൃത്തി ബാലിശമാണെന്നും സ്നേഹം ഇങ്ങനെയല്ല പ്രകടിപ്പിക്കേണ്ടതെന്നും മണ്ടത്തരമാണിതെന്നതുമടക്കം നിരവധി വിമര്ശനങ്ങളാണ് വീഡിയോക്കെതിരെ വരുന്നത്.
View this post on Instagram
വളരെ സന്തോഷത്തില് യുവതി പച്ച കുത്താന് ഇരിക്കുന്നതും ടാറ്റൂ ആര്ട്ടിസ്റ്റ് ഒരു പേപ്പറില് ആദ്യം ‘സതീഷ്’ എന്ന പേര് എഴുതി നെറ്റിയില് ഒട്ടിച്ച് വലുപ്പം ശരിയാണോ എന്ന് നോക്കുന്നതും വീഡിയോയില് കാണാം. പിന്നീട് ടാറ്റൂ മെഷീന് കൊണ്ട് പച്ചകുത്തല് ആരംഭിക്കുന്നു. അപ്പോള് വേദന കൊണ്ടായിരിക്കണം, യുവതി അസ്വസ്ഥയാകുന്നത് കാണാം. സത്യസന്ധമായ പ്രണയം എന്ന തലക്കെട്ടോടെയാണ് വീഡിയോ പോസ്റ്റ് ചെയ്തിരിക്കുന്നത്. മാര്ച്ച് 18ന് പോസ്റ്റ് ചെയ്ത വീഡിയോ ദശലക്ഷക്കണക്കിന് ആളുകളാണ് കണ്ടത്.
എന്നാല് ഇത് അതിരുകടന്ന പ്രവൃത്തിയായിപ്പോയെന്നും ഇതുകൊണ്ടാണ് വിദ്യാഭ്യാസം വളരെ പ്രധാനപ്പെട്ടതാകുന്നതെന്നും ആളുകളിലെ സാമാന്യബോധത്തിന് ആര്ഐപി എന്നുമെല്ലാം നിരവധി നെഗറ്റീവ് കമന്റുകള് വീഡിയോയ്ക്ക് താഴെയായി കാണാം. സത്യസന്ധമായ സ്നേഹത്തിന് തെളിവ് നിരത്തേണ്ടതില്ലെന്നും കരുതലിലൂടെയും സ്നേഹത്തിലൂടെയും മുന്ഗണനയിലൂടെയും പിന്തുണയിലൂടെയുമെല്ലാം അത് അനുഭവിച്ചറിയാനാകുമെന്നും ഇത് വിഡ്ഢിത്തരമാണെന്നും മറ്റൊരാള് കമന്റ് ചെയ്തിരിക്കുന്നു.
Discussion about this post