കണ്ണൂർ: ഇരിട്ടിയിൽ വീട് കുത്തിത്തുറന്ന് സ്വർണം കവർന്ന സംഭവത്തിൽ പ്രതികൾ അറസ്റ്റിൽ. കാല്ലം സ്വദേശി എസ് അഭിരാജ്, കാസർകോട് ഉപ്പള സ്വദേശി കെ കിരൺ എന്നിവരാണ് അറസ്റ്റിലായത്. 20 പവൻ സ്വർണവും പണവുമാണ് ഇരുവരും ചേർന്ന് വീട്ടിൽ നിന്നും മോഷ്ടിച്ചത്.
ഇന്നലെ രാവിലെയോടെയായിരുന്നു സംഭവം. ഉളിക്കൽ കല്ലുവയൽ ബെന്നി ജോസഫിന്റെ വീട്ടിലായിരുന്നു കവർച്ച. രാവിലെ ബെന്നിയും കുടുംബവും പ്രാർത്ഥനയ്ക്കായി പള്ളിയിലേക്ക് പോയിരുന്നു. ഈ സമയത്തായിരുന്നു ഇരുവരും വീട്ടിലേക്ക് അതിക്രമിച്ച് കയറിയത്. അലമാരിയിൽ സൂക്ഷിച്ച 20 പവൻ സ്വർണത്തിന് പുറമേ 22,000 രൂപയും നഷ്ടമായിരുന്നു. ബെന്നി വീട്ടിലെത്തിയപ്പോഴാണ് മോഷണ വിവരം അറിഞ്ഞത്. ഉടനെ പോലീസിൽ പരാതി നൽകുകയായിരുന്നു. ഇതേ തുടർന്ന് നടത്തിയ അന്വേഷണത്തിൽ ഇന്ന് പുലർച്ചെ ധർമ്മശാലയിൽ നിന്നാണ് ഇയാളെ പിടികൂടിയത്.
സംഭവം ഉണ്ടായി 48 മണിക്കൂറിനുള്ളിലാണ് പോലീസ് പ്രതികളെ പിടികൂടിയിരിക്കുന്നത്. വീട്ടിൽ സിസിടിവി ഉണ്ടായിരുന്നു. എന്നാൽ പിടിക്കപ്പെടാതിരിക്കാൻ ഡിവിആറും മോഷ്ടാക്കൾ കവർന്നിരുന്നു. ഇത് അന്വേഷണ സംഘത്തിന് പ്രതിസന്ധിയായി. എന്നാൽ സ്ഥലത്ത് നടത്തിയ പരിശോധനയുടെയും മറ്റിടങ്ങളിലെ സിസിടിവി ദൃശ്യങ്ങളുടെയുമെല്ലാം സഹായത്തോടെ പ്രതികളെ കണ്ടെത്തുകയായിരുന്നു.
Discussion about this post