ടോറന്റോ : ചൈനയുടെ ഏഷ്യൻ ഇൻഫ്രാസ്ട്രക്ചർ ഇൻവെസ്റ്റ്മെന്റ് ബാങ്കുമായുള്ള (എഐഐബി) ബന്ധം നിർത്തുകയാണെന്ന് കനേഡിയൻ ധനമന്ത്രി ക്രിസ്റ്റ്യ ഫ്രീലാൻഡ്. എഐഐബിയുടെ ഗ്ലോബൽ കമ്മ്യൂണിക്കേഷൻസ് ഡയറക്ടറായ കാനഡ വംശജൻ സ്ഥാനത്ത് നിന്ന് രാജിവച്ചതായി പ്രഖ്യാപിച്ചിരുന്നു. ബാങ്കിൽ ‘കമ്മ്യൂണിസ്റ്റ് പാർട്ടിയുടെ ആധിപത്യം’ ആണെന്ന് വിമർശിക്കുകയും ചെയ്തു. ഇതേ തുടർന്നാണ് നടപടി. എന്നാൽ ആരോപണം അടിസ്ഥാനരഹിതവും നിരാശാജനകവുമാണെന്ന് എഐഐബി അറിയിച്ചു.
ബാങ്കുമായി ബന്ധപ്പെട്ട എല്ലാ ഇടപാടുകളും കാനഡ സർക്കാർ ഉടൻ നിർത്തലാക്കുമെന്ന് കനേഡിയൻ ധനമന്ത്രി അറിയിച്ചു. ബാങ്കിനെതിരെ ഉയർന്ന ആരോപണങ്ങൾ പരിശോധിക്കാനും എഐബിയുമായുള്ള കാനഡയുടെ പങ്കാളിത്തം ഉടനടി അവലോകനം ചെയ്യാനും ധനകാര്യ വകുപ്പിന് നിർദ്ദേശം നൽകിയിട്ടുണ്ട്.
ചൈനീസ് കമ്യൂണിസ്റ്റ് പാർട്ടിയാണ് ബാങ്കിനെ നിയന്ത്രിക്കുന്നത് എന്ന് നേരത്തെയും ആരോപണങ്ങളും ഉയർന്നിരുന്നു. ജസ്റ്റിൻ ട്രൂഡോയുടെ ഭരണത്തിന് കീഴിലാണ് കാനഡ എഐഐബിയുമായി ചേരുന്നത്. അന്ന് പ്രതിപക്ഷം വ്യാപക വിമർശനം ഉന്നയിച്ചിരുന്നു. ചൈനയുടെ ഉപകരണമാണ് ബാങ്ക് എന്ന ആരോപണമാണ് ഉയർത്തിയിരുന്നത്.
ചൈനയുമായുള്ള കാനഡയുടെ ബന്ധം കഴിഞ്ഞ അഞ്ച് വർഷമായി കുറഞ്ഞുവരികയാണ്. കനേഡിയൻ ധനമന്ത്രിയുടെ പുതിയ നടപടിയോട് ഇത് വീണ്ടും കുറയുമെന്നാണ് റിപ്പോർട്ട്.
Discussion about this post